Përfaqësuesja e Zvicrës e ka nisur me fitore kampanjën e sivjetme në Kampionatin Botëror “Katar 2022”, raporton FrontOnline.
Helvetikët në krye me Granit Xhakën dhe Xherdan Shaqirin u përballën me Kamerunin në kuadër të grupit G.
Ndeshja që u zhvillua në “Al Janoub Stadium” i takoi Zvicrës me rezultat minimal, 1:0.
Golin e vetëm dhe të fitores për Zvicrën e shënoi futbollisti me prejardhje nga Kameruni, Breel Embolo në minutën e 48-të pas asistimit të Xherdan Shaqirit.
Mesfushori shqiptar, Xherdan Shaqiri që asistoi te goli i fitores tha pas ndeshjes se rezultati ka mundur të jetë më i thellë, por sipas tij, e rëndësishme është që fituan.
“Ne donim të kishim një fillim mbarë. Të dyja skuadrat nuk luajtëm mirë. Por, ishim më të mirë në pjesën e dytë dhe arritëm të shënojmë gol. Mund të ishte 2:0 ose 3:0. E rëndësishme është që tashmë kemi përmbushur detyrën, por ne nuk kemi një grup të lehtë”, ka thënë Shaqiri pas ndeshjes./FrontOnline/