Kryetari në detyrë i Partisë Demokratike të Kosovës (PDK), njëhrit edhe kandidati për kryeministër të Kosovës, Enver Hoxhaj ka prezantuar aderimin e Faton Abdullahut, i cili i është bashkuar sot PDK-së.
Hoxhaj duke i uruar mirëseardhje Abdullahut ka theksuar se Partia Demokratike është një shtëpi e madhe që së bashku me procesin e reformimit të brendshëm, po hapet edhe për intelektualët jashtë partisë, të cilët do ta kenë vendin dhe hapësirën e merituar në PDK.
“Tani Kosova po kalon në faza të vështira politike. Shteti ynë, i ndërtuar mbi shumë sakrifica, sot gjendet në udhëkryq. E kërcënuar së brendshmi nga populizmi dhe së jashtmi nga goditja ndaj UÇK-së dhe shtetësisë, Kosova ka nevojë të udhëhiqet nga një parti e dëshmuar shtetformuese si PDK-ja.”, tha ai.
Hoxhaj tha se për ta parandaluar zhbërjen e shtetit, PDK-ja do të garojë në këto zgjedhje në aleancë të gjerë me qytetarët dhe ekspertët e fushave të ndryshme që mund ta ndihmojnë vendin në këto momente vendimtare.
“PDK-ja po kthehet edhe një herë te baza, po dëgjon pulsin e qytetarit, po i ndjen kërkesat e tij dhe së bashku me të po e krijon një bllok të gjerë për ta parandaluar zhbërjen e shtetit dhe kthimin e shtetit në binarët e zhvillimit ekonomik dhe bashkëpunimit me aleatët perëndimorë, në krye me ShBA-në. Blloku i madh opozitar i koalicionit mes PDK-së dhe qytetarit është garanca e vetme për ta ruajtur shtetin dhe për ta rimëkëmbur Kosovën ekonomikisht dhe kombëtarisht.”, shtoi Hoxhaj.
Ndërkaq, Faton Abdullahu duke e falënderuar kryetarin Hoxhaj për pritjen tha se ka vendosur t’i bashkëngjitet PDK-së, sepse kjo parti ka hapur dyert për ide të reja, për njerëz të ri, për ndryshime të mëdha.
Si biri i ish të burgosurit politik Rexhep Abdullahu, Abdullahu theksoi se ADN-ja e tij politike dhe ADN-ja atdhetare e familjes së tij natyrshëm e lidhin me PDK-në.
“Unë jam i bindur se një Parti politike vlerësohet nga rrënjët. Unë ju besoj rrënjëve të PDK-së, sepse besoj tek vlerat e luftës, tek UÇK -ja. UÇK është margaritar i qytetërimit evropian. Në këtë pjesë të Evropës Kosova fitoi miq perëndimorë falë luftës së UÇK -së me pushkë në dorë. Falë kësaj lufte lëvizën kufijtë në Ballkan ato u shtynë tutje në të mirë të interesave evro-atlantike. Unë besoj palëkundshëm në këto rrënjë të PDK-së ashtu sikundër besoj se degët e këtij trungut edhe mund të krasiten për tu bërë më të mira e më të shëndosha. PDK më ka bindur sot më shumë se kurrë se aty ku ka populizëm, aty ajo di të vendos pragmatizëm, aty ku ka tutcana dhe hezitim, ajo di dhe mund të kthej guxim, aty ku ka zhgënjim, aty di të kthej shpresë e besim dhe aty ku ka ndarje e përçarje di dhe mund të kthej bashkim.”, tha ai.
Sipas Abdullahut, PDK-së i është bërë një hile e madhe pasi partia po hyn në garë zgjedhore dhe pa kryetarin e saj Kadri Veselin, por që punët e filluara mbarë nga ai, idetë për reforma e ndryshime, strategjinë për ta luftuar krimin e korrupsionin dhe riparimi i raporteve më aleatët e vendit do t’i shtyjë përpara më fortë se kurrë kryeministri i ardhshëm i Kosovës, Enver Hoxhaj.
“Kosovës i duhet një Kryeministër si z. Hoxhaj që e kupton drejtë e mirë gjuhën evro-atlantike e jo një Kryeministër i cili nuk e gjen rrugën për në Uashington. Sot, z. Hoxhaj është këtu sepse tek ai PDK ka pa njeriun që krijon balance me korrektësi dhe guxim dhe bashkon njerëz me urti e largpamësi. Kurrë më shumë nuk na është dashur një Kryeministër i tillë i cili në përballjen me të gjitha të këqijat e Kosovës dhe sidomos me rrezikun nga Serbia, na bashkon dhe na balancon drejtë e dobishëm me aleatët tanë. Edhe një herë faleminderit Kryeministër i ardhshëm i Kosovës, juve dhe bashkëpunëtorëve të juaj për besimin dhe mundësinë – dalshim faqebardhë – bashkë me Kosovën dhe gjithë qytetarët e saj – shnet e suksese.”, përfundoi ai.
Faton Abdullahu ka lindur në Prishtinë, ku e ka kryer shkollën fillore dhe të mesme. Ai ka përfunduar Fakultetin Juridik në Universitetin e Prishtinës “Hasan Prishtina”, ndërsa ka magjistruar shkencat politike në njërin nga Universitetet më të mira në Britani “UCL”.
Faton Abdullahu është autor i disa librave dhe analist politik në mediat vendore, për të cilat edhe shkruan rregullisht kolumne. Ai ka qenë kryeredaktor dhe gazetar në disa media si në vend ashtu edhe jashtë vendit. Ai ka qenë zëdhënës i Qeverisë së Kosovës në vitin 2016/17.
