Zëvendëskryeministrja në detyrë dhe kryetarja e partisë boshnjake NDS, Emilja Rexhepi, ka folur për FrontOnline, pas takimit me kryeministrin Albin Kurti.

Ajo pas takimit me kryeministrin Albin Kurti tha se vazhdojnë bashkëpunimin në qeverinë e re dhe e mbështesin Kurtin për kryeministër.

‘’Ne vazhdojmë bashkëpunimin në qeverinë e re dhe mbështesim z. Kurti për kryeministër’’ shprehet ajo.

Rexhepi potencoi se gjithçka që është në interes të të gjithë qytetarëve të Kosovës do e mbështetë, duke përmendur disa nga prioritetet kryesore të partisë së saj.

“Gjithçka që është në interes të të gjithë qytetarëve të Kosovës më ka tërhequr, duke filluar nga politika sociale, arsimi, përdorimi i gjuhëve zyrtare, pastaj reformat në shëndetësi, përkrahja përmes grandeve të ndryshme dhe subvencioneve qeveritare, përmes punësimit të boshnjakëve deri te zhvillimi ekonomik dhe hapja e fabrikave në vendet ku jetojmë” tha Rexhepi për FrontOnline.

Rexhepi gjithashtu theksoi rëndësinë e bashkëpunimit dhe respektit ndërmjet qytetarëve të Kosovës për të arritur prosperitetin.

‘’Vetëm së bashku, nëse e respektojmë njëri-tjetrin dhe i besojmë njëri-tjetrit, Kosova ka prosperitet dhe është vend i të gjithë qytetarëve të saj pa dallim etnie, është pikërisht forca dhe pasuria jonë me të cilën krenohen të gjithë popujt që e pranojnë Kosovën si shtet të tyre’’ u shpreh ajo./FrontOnline/