Njohësi i çështjeve juridike, Blerim Burjani në një prononcim për “Front Online” tha se tashmë janë tejkaluar të gjitha afatet kushtetuese dhe se vendi ndodhet në një situatë të jashtëzakonshme institucionale.
Burjani ka kritikuar Lëvizjen Vetëvendosje, duke thënë se procesi është bllokuar për shkak të përpjekjeve për të arritur një marrëveshje politike për zgjedhjen e presidentit.
“Të gjitha afatet kushtetuese kanë kaluar, s’ka më afat specifik. Në sferën politike, LVV nuk ka dashtë të merret me këtë dhe e ka bllokuar këtë proces me arsyetimin që duhet të bëjë marrëveshje me ndonjë parti ku po flet me LDK-në për president, që ta zgjedhë këtë dhe pastaj Kuvendin e Qeverinë”, ka thënë Burjani.
Sipas tij, fillimisht duhet të konstituohet Kuvendi dhe të formohet Qeveria, e më pas të procedohet zgjedhja e presidentit.
“Njëherë duhet të konstituohet Kuvendi, Qeveria e pastaj Presidenti, në të kundërtën paraqitet si shkelje e Kushtetutës. Jemi në një situatë të jashtëzakonshme kushtetuese e institucionale”, është shprehur Burjani.
Burjani ka vlerësuar se situata tashmë kërkon një ndryshim të qasjes politike dhe institucionale.
“Jemi në një situatë të jashtëzakonshme edhe në aspektin kushtetues e institucional, pasi LVV po i bën një politikë të dëmshme shtetit. PDK e AAK refuzuan bashkëpunimin me LVV, derisa LDK nuk po duket aspak serioze që i jep mundësinë Kurtit me zgjedh presidentin”, tha ai./Front Online
Njohësit e Kushtetutës: Janë tejkaluar afatet kushtetuese, Kuvendi mbetet i bllokuar
