Eksperti i sigurisë kibernetike Hekuran Doli ka ngritur dyshime lidhur me pohimet e Ministrisë së Financave se sulmi i sotëm kibernetik kundër sistemit informativ të tatimit në pronë ka përfunduar pa ndonjë dëm të madh.

Ai në një postim në Facebook ka shtruar pyetjen sesi hakerët kanë arritur të kenë qasje në Regjistrin Civil të Kosovës përmes të cilave kanë tentuar të lexojnë të dhënat e faturave të tatimit në pronë.

Postimi i plotë:

I gëzuar të dëgjoj konstatimin e menjëhershëm se tentativa për sulm kibernetik nuk paska qenë e suksesshme, pavarësisht se një konstatim i tillë do të duhej të sillej në bazë të një analize të detajuar të situatës, e cila në rastin më të mirë do të zgjaste më shume se kaq. Sido që të jetë kjo më bën të gëzuar.

Mirëpooooo…… njoftimi i MF po thotë se hakerët kanë shfrytëzuar të dhënat personale të qytetarëve të marra nga regjistrit civil. E në regjistër civil qysh morën qasje?

Ndryshe, Ministria e Financave sot ka bërë të ditur se Sistemi Informativ i Tatimit në Pronë, më saktësisht shërbimi online për shtypjen e faturës së tatimit në pronë është tentuar të keqpërdoret nga sulmues kibernetikë të pa-identifikuar deri më tani, të cilët kanë përdorur të dhëna personale të Regjistrit Civil të Kosovës përmes të cilave kanë tentuar të lexojnë të dhënat e faturave të tatimit në pronë.

Ministria e Financave siguron qytetarët se sulmi i tentuar nuk ka arritur të cenojë integritetin dhe sigurinë e sistemi informativ në fjalë, ndërkohë që rasti është paraqitur dhe se tani me të po merren organet kompetente.