Nëse ngriheni gjatë natës dhe ndjeheni të uritur, kjo mund të jetë për shkak të disa arsyeve, përfshirë stresin dhe sindromën e ngrënies së natës, ekspertët kanë zbuluar. Niveli i urisë, i cili rregullohet pjesërisht nga ritmi cirkadian, rritet përgjithësisht gjatë ditës. Është  më e larta në mbrëmje dhe zvogëlohet gjatë natës. Pra, nëse po ngriheni në orët e vona me një ndjenjë urie, ekspertët thonë se ia vlen të eksploroni. Neuro-shkencëtarja Kristen L. Knutson, pranoi që kjo është ‘e pazakontë’ sepse orët tona të brendshme biologjike nuk presin që ne të hamë atëherë. Nëse ndonjëherë zgjoheni në mes të natës i uritur nuk duhet t’ju shqetësojë, por nëse ndodh shpesh, mbase duhet të kërkoni përgjigje. Ekspertët kanë zbuluar disa arsye.

Ju nuk hani sa duhet gjatë ditës

Nëse nuk merrni kalori të mjaftueshme gjatë ditës, mund të zgjoheni të uritur në mes të natës. “Nëse jeni në dietë ose kufizoni veten në ndonjë mënyrë, të tilla si anashkalimi i vakteve ose ushtrime të tepërta, mund të mos merrni mjaftueshëm kalori”, thotë dietologia Alissa Rumsey.

Ju nuk bëni gjumë të mjaftueshëm

Gjumi i trazuar mund të nxjerrë jashtë ekuilibrit hormonet që rregullojnë oreksin – grelinën dhe leptinën, të cilat mund të çojnë në urinë dhe kërkimin e ushqimeve me shumë karbohidrate. “Hulumtimet e mëparshme eksperimentale kanë lidhur humbjen e gjumit me rritjen e oreksit”, shtoi Knutson.

Ju jeni nën stres

Ndonjëherë uria fizike nuk është ajo që ju zgjon nga gjumi, arsyeja mund të jetë përgjigjja e trupit tuaj ndaj një periudhe stresuese në jetën tuaj. Kur të zgjoheni, mund t’i drejtoheni ushqimit për t’u qetësuar. “Ushqimi emocional sigurisht që mund të ngadalësojë proceset e mendimit. Nëse trupi juaj është duke tretur ushqimin, ai mund të qetësojë ankthin që ju bën të mos bini në gjumë. Për fat të keq është një mënyrë shumë efektive për të harruar ato mendime”, tha Kelly Allison, një profesore e psikologjisë dhe drejtoreshë e Qendrës për Pesha dhe Ushqyerja në Universitetin e Pensilvanisë.

Ju keni sindromën e ngrënies gjatë natës

Nëse zgjoheni shpesh me një ndjenjë urie, disa herë në javë, mund të jetë një shenjë e një çrregullimi të quajtur sindroma e ngrënies së natës”. Njerëzit me këtë çrregullim marrin një pjesë të konsiderueshme të kalorive të tyre ditore pas darkës, sepse ata kanë pak dëshirë për ushqim gjatë ditës. Ata mund të vuajnë nga çrregullime të humorit që përkeqësohen në mbrëmje, kanë probleme me gjumin dhe besojnë se duhet të hanë diçka për të rënë në gjumë përsëri./FrontOnline/