Kryeministri Edi Rama dhe bashkëshortja e tij, Linda Rama, shtruan mbrëmjen e sotme një iftar në xhaminë e Ballies në Elbasan, ku të pranishëm ishin përfaqësues të klerit, diplomatë dhe zyrtarë të lartë.

Në fjalën e tij, Rama uroi besimtarët myslimanë për muajin e Ramazanit dhe solli në vëmendje hapjen e xhamisë së Namazgjasë në Tiranë. “Sot në Tiranë ka hapur dyert më në fund, pas shumë vitesh pritjeje, edhe xhamia e madhe e Namazgjasë”, tha ai.

Kryeministri theksoi rëndësinë e harmonisë fetare dhe atmosferës së bashkimit që sjell Ramazani. “Kjo sofër tradicionale më jep ndjesi fëmijënore gëzimi dhe e shijoj këtë muaj sepse na jep mundësinë të ndjehemi më mirë, ku paudhësitë dhe shëmtitë e kohës na duken të kapërcyeshme”, u shpreh Rama.

Duke folur për vlerat e tolerancës fetare në Shqipëri, ai theksoi se komuniteti mysliman në vend nuk është problem, por një vlerë e shtuar. “Myslimanët e Shqipërisë janë një pasuri dhe një dëshmi se vendi ynë është i denjë për të qenë pjesë e BE”, deklaroi ai.