Sllovakia ka pranuar një dërgesë prej 200 mijë dozave të vaksinës ruse, “Sputnik V”, kundër sëmundjes Covid-19, duke u bërë shteti i dytë i BE-së që bën një hap të tillë.

Javën e kaluar, Sllovakia e shënoi shkallën më të lartë të viktimave të koronavirusit për numër të banorëve, sipas faqes “Our World in Data”.

Vendi i vogël i Evropës Qendrore e ndoqi shembullin e Hungarisë për marrjen e vaksinës ruse, ndonëse ky ilaç nuk është miratuar nga rregullatori i Bashkimit Evropian, Agjencia Evropiane e Prodhimeve Mjekësore.

“Është në rregull të blihet vaksina ruse, sepse Covid-19 nuk di asgjë për gjeopolitikën. Unë nuk e kam problem që ta marr këtë vaksinë vetë”, tha kryeministri sllovak, Igor Matoviq.

Sllovakia do të blejë gjithsej 2 milionë doza të vaksinës “Sputnik V” dhe pret që gjysma e tyre të arrijnë këtë muaj, shkruan Free Europe, transmeton Gazeta Express.

Ministri sllovak i Shëndetësisë, Marek Krajci, tha se përdorimi i kësaj vaksine do të miratohet në fillim të muajit dhe se programi i vaksinimit mund të fillojë brenda disa javësh.

Në vendin fqinj të Sllovakisë, në Republikën Çeke, kryeministri Andrej Babis tha se vendi i tij mund ta përdorë vaksinën “Sputnik V” për ta luftuar shkallën më të lartë në botë të infeksionit për numër të banorëve.

Në gusht të vitit të kaluar, Rusia u bë shteti i parë në botë që miraton një vaksinë kundër sëmundjes Covid-19, duke nxitur dyshime rreth sigurisë dhe efikasitetit të saj, sepse vaksina qe miratuar pa nxjerrjen e rezultateve të fazës së tretë të testimit.