Të hënën e kësaj jave, Tirana u trondit kur u publikua lajmi se një 14-vjeçar mbeti i vrarë me thikë në zemër nga një bashkëmoshatar i tij.

Lajmi pushtoi mediat në vend dhe më gjerë, duke shprehur ngushëllime për familjen e Martin Canit gjithandej.

Por, dhimbjen më të madhe e ndjenë familja e Martinit.

Prindërit e tij tashmë kanë dhënë intervista për media të ndryshme, ku kanë rrëfyer detaje nga jeta e Martinit tashmë të ndjerë.

Një moment rrëqethës është edhe rasti me vëllain e vogël të Martinit, të cilit prindërit thanë se ende nuk i kanë treguar se çfarë ka ndodhur. Madje atë e kanë gënjyer.

Engjëll dhe Florina Cani kanë thënë se djalit të tyre të vogël i kanë thënë se Martinin e ka marrë Kombëtarja kuqezi.

Për të justifikuar vizitat e njerëzve, çifti Cani thanë në një intervistë për “Opinion” se i kanë thënë se Martini ka shënuar një gol dhe vijnë për urime.

Pjesë nga intervista:

A keni fëmijë të tjerë?

Babai: Po, kam dhe një djalë të vogël.

E ka mësuar lajmin?

Babai: Jo, i kemi thënë që Martinin e ka marrë Kombëtarja dhe ka bërë gol dhe njerëzit vijnë e na falënderojnë.

Ngjarja e rëndë që tronditi vendin ndodhi të hënën. Të rinjtë, Martin Cani dhe Mario Perlleshi ishin konfliktuar gjatë pushimit të gjatë në shkollë, por ishin ndarë nga roja i shkollës dhe mësuesit.

Disa orë më pas, rreth orës 13.00, kur edhe kishin përfunduar mësimin, u ritakuan në oborr ku edhe u përleshën me thika.

Autori vrau 14-vjeçarin dhe plagosi shokun e ngushtë të viktimës, Luis Meçen.

Gjatë marrjes në pyetje për shkakun e sherrit, autori është shprehur se përplasja kishte nisur për një “pse më shikon?”.