Sekretari amerikan i Shtetit Marco Rubio dhe i dërguari i ri i administratës Trump në NATO po kërkojnë që të sigurojnë aleatët e NATO-s për angazhimin e SHBA-së ndaj aleancës.

Rubio të enjten kritikoi “histerinë dhe hiperbolën” në media në lidhje me qëllimet e presidentit Donald Trump, pavarësisht sinjaleve të vazhdueshme nga Uashingtoni se NATO-ja siç ka ekzistuar për 75 vjet mund të mos jetë më e rëndësishme.

Rubio dhe ambasadori i sapokonfirmuar i SHBA-së në NATO, Matt Whitaker ndodhen në Bruksel për një takim të ministrave të jashtëm të aleancës, në të cilin shumë shpresojnë se Rubio do të hedhë dritë mbi planet e sigurisë së SHBA-së në Evropë.

“Shtetet e Bashkuara janë po aq aktive në NATO sa ka qenë ndonjëherë,” u tha Rubio gazetarëve ndërsa përshëndeti shefin e NATO-s Mark Rutte përpara se të fillonte takimi. “Dhe një pjesë e kësaj histerie dhe hiperbole që shoh në mediat globale dhe disa media vendase në Shtetet e Bashkuara për NATO-n është e pajustifikuar.”

“Presidenti Trump e bëri të qartë se mbështet NATO-n”, tha Rubio. “Ne do të qëndrojmë në NATO”, raporton Associated Press.

“Ne duam që NATO të jetë më e fortë, ne duam që NATO të jetë më e dukshme dhe e vetmja mënyrë që NATO-ja mund të bëhet më e fortë, më e dukshme është nëse partnerët tanë, shtetet kombëtare që përbëjnë këtë aleancë të rëndësishme, kanë më shumë aftësi”, tha ai.

Në një deklaratë, Ëhitaker tha se “nën udhëheqjen e Presidentit Trump, NATO do të jetë më e fortë dhe më efektive se kurrë më parë dhe unë besoj se një NATO e fuqishme mund të vazhdojë të shërbejë si një themel paqeje dhe prosperiteti”. Por ai shtoi: “Vitaliteti i NATO-s qëndron tek çdo aleat që bën pjesën e tij të drejtë.”