Donjeta Sadiku, Bashkim Bajoku dhe Shpëtim Bajoku do ta përfaqësojnë Kosovën në Kupën e Botës “Feliks Stamm”, ka njoftuar Federata e Boksit e Kosovës.

“Ekipi i përfaqësueses së Kosovës në boks ka udhëtuar sot drejt Varshavës për të marrë pjesë në turneun prestigjioz ndërkombëtar, Kupa Botërore “Feliks Stamm”, që do të mbahet nga data 10 deri më 17 maj 2025. Kosova do të përfaqësohet nga tri boksierë: Donjeta Sadiku në kategorinë deri në 60 kilogramë, e cila do të udhëhiqet nga u.d. selektorja Marjola Sallauka. Në konkurrencën e meshkujve, do të garojnë vëllezërit Bashkim Bajoku (55 kg) dhe Shpetim Bajoku (70 kg), të drejtuar nga selektori Faton Xhakli. Ky turne i njohur ndërkombëtarisht, përveç prestigjit sportiv, është i vlefshëm edhe për grumbullimin e pikëve në ranglistën botërore të boksit”, ka njoftuar FBK.

“Gjithashtu gjyqtari ndërkombëtar Latif Demolli do të jetë i ftuar nga Federata Botërore për të ndarë drejtësinë në këtë ngjarje”.