Deputetja e Partisë Demokratike të Kosovës, Blerta Deliu, ka reaguar ashpër pas deklaratave të ministres në detyrë të Ekonomisë, Artane Rizvanolli, lidhur me shpenzimet e energjisë elektrike nga qytetarët.

Rizvanolli u shpreh se Qeveria ka propozuar që rritja e çmimit të energjisë të jetë më ‘e butë’, por gjithashtu kishte komentuar se është e vështirë të shpjegohet pse disa familje harxhojnë shumë energji, sidomos gjatë verës, duke aluduar se kjo mund të ketë lidhje me aktivitete ilegale, si prodhimi i kriptovalutave apo drogës.

Për këtë, ka reaguar Blerta Deliu duke e quajtur këtë një sulm ndaj qytetarëve dhe bizneset.

“Për dështimet e veta fajësojnë qytetarët! Në kohën kur ka një indinjim të madh me paralajmërimet për shtrenjëtim të rrymës, ministrja në detyrë Artane Rizvanolli paska sulmuar qytetarët dhe bizneset, me aludimin se dikush mund të prodhoje drogë dhe kriptovaluta. Kishin premtuar ulje të çmimit të energjisë elektrike gjatë fushatës së vitit 2019, ndërkohë që sot për dështimet e tyre fajësojnë e akuzojnë qytetarët. Për marre”, shkroi ajo në Facebook.

Të shtunën, më 5 prill 2025, në Prishtinë do të mbahet një protestë kundër rritjes së çmimit të energjisë elektrike, e cila pritet të ketë një ndikim të rëndë për qytetarët dhe bizneset.

Aktivistët dhe qytetarët do të mblidhen në sheshin “Skënderbe”, duke filluar nga ora 15:00, për të shprehur kundërshtimin ndaj rritjes prej 15% të tarifave të energjisë elektrike.