Policia e Kosovës ka bërë të ditur se dje është tentuar të digjet dera e hyrjes së objektit kishtar “Shën Pantelija”, kishë ortodokse në rrugën “Haxhi Krasniqi” në Prizren.

Sipas njoftimit të policisë, rasti është raportuar dje nga një qytetar rreth orës 23:09.

“I njëjti ka njoftuar policin se në rrugën Haxhi Krasniqi në Prizren, saktësisht tek objekti kishtar “Shën Pantelija”- kishë ortodokse, të dyshuar të pa njohur kanë tentuar ta djegin derën e hyrjes së këtij objekti. Patrulla policore i është përgjigjur rastit dhe me të arritur në vendngjarje konfirmojnë se në vendin e ngjarjes kundërmon era e benzinës dhe është një shishe e plastikës që është djegur”, thuhet në njoftimin e policisë.

Pasi që janë mbledhur provat dhe dëshmitë, në lidhje me rastin është njoftuar Prokurori i Shtetit i cili ka rekomanduar që të iniciohet rasti ‘Shkaktim i rrezikut të përgjithshëm’.