[wp-story]

Zgjedhjet 2021

Dalin rezultatet e kandidatëve në Fushë Kosovë: Osmani para Konjufcës

Dalin rezultatet e kandidatëve në Fushë Kosovë: Osmani para Konjufcës
10:58 | 18 Shkurt 2021

Vjosa Osmani ka arritur të sigurojë afërsisht 80 për qind të votës së përgjithshme të Lëvizjes Vetëvendosje në Komunën e Fushë Kosovës, në zgjedhjet e 14 shkurtit.

Ish-kandidatja e Lidhjes Demokratike të Kosovës për kryeministre, e cila kryesoi listën e kandidatëve të LVV-së për deputetë në këto zgjedhje – ndonëse formalisht mbajti numrin dy, – ka fituar 7 mijë e 358 vota në Fushë Kosovë, një bastion i kahershëm i LDK-së.

Bazuar në formularët e rezultateve të zgjedhjeve të 14 shkurtit, të publikuara sot në uebsajtin e Komisionit Qendror të Zgjedhjeve, Osmani kryeson listën e më të votuarve të LVV-së në Fushë Kosovë, me rreth 2 mijë vota më shumë sesa ndjekësi i parë, numri tre në listë, Glauk Konjufca.

Konjufca ka arritur t’i sigurojë kandidaturës së tij për deputet, saktësisht 5 mijë e 397 vota në Fushë Kosovë.

Fushë Kosova, në zgjedhjet e së dielës e nxori Lëvizjen Vetëvendosje parti të parë në këtë pjesë të vendit, me mbi 9 mijë vota dhe një përqindje prej 55% të votave të fituara. LVV-në në Fushë Kosovë, e pasoi LDK-ja me rreth 7 mijë vota më pak. LDK-ja siguroi vetëm 2 mijë e 992 vota.

Një diferencë mes Osmanit si e udhëheqëse e listës së kandidatëve më të votuar të LVV-së me Konjufcën dhe të tjerët, rezulton të figurojë edhe në disa komuna të tjera të vendit.

Megjithatë, ende nuk janë zyrtarizuar rezultatet e kandidatëve për deputetë në të gjithë vendin.

Sipas të dhënave preliminare të Komisionit Qendror të Zgjedhjeve, për zgjedhjet parlamentare të mbajtura më 14 shkurt 2021, Lëvizja Vetëvendosje e udhëhequr nga Albin Kurti, fitoi rreth 48 për qind, pasuar nga Partia Demokratike e Kosovës me 17.35 për qind.

E treta është radhitur Lidhja Demokratike e Kosovës me 13.18 për qind dhe në vendin e katërt është Aleanca për Ardhmërinë e Kosovës me 7.42 për qind.

Comodita nis 35 kontejnerë me dyshekë për në SHBA

Të tjera