Kuvendi i Kosovës ka publikuar pamjet nga takimi konsultativ mes kryesuesit të seancës së sotme, Avni Dehari, me përfaqësuesit e partive politike.

Dehari në fillim të seancës së sotme ftoi ata për, siç tha, t’u konsultuar se si të vazhdohet tutje pas ngërçit të krijuar të martën ku nuk kaloi raporti i Komisionit për verifikimin e kuorumit dhe mandateve që do t’i hapte rrugë betimit të deputetëve e konstituimit të Kuvendit.

“Letra që ka ardhur nga presidentja ka dhënë sqarime në një aspekt, por nuk ka dhënë një zgjidhje përfundimtare. Ajo kërkon nga ne që të gjejmë forcë dhe mirëkuptim që të tejkalojmë dhe mos ta bllokojmë situatën në Kuvend. Për këtë arsye, kam nevojë që së bashku t’i thërras përfaqësuesit e partive politike në një sallë që të konsultohemi se si do të vazhdojmë tutje. Të konsultohemi që të mos bëjmë ndonjë shkelje procedurale, e ndiej më së të nevojshme”, tha Dehari në fillimin e seancës që e mbylli pa e hedhur në votim pikën e parë të rendit të ditës.

Kuvendi, krahas një njoftimi të shkurtë për seancën, ka publikuar edhe pamjet nga brenda takimit të Deharit me përfaqësuesit e partive politike.

“Kuvendi i Republikës së Kosovës u mblodh sot për të vijuar punimet e seancës konstituive të Legjislaturës së Nëntë, të ndërprerë më 15 prill. Në hapje të saj, kryesuesi Avni Dehari ftoi përfaqësuesit e subjekteve politike për një takim konsultativ përkitazi me raportin e Komisionit të përkohshëm për verifikimin e kuorumit dhe të mandateve të deputetëve. Pas takimit kryesuesi Dehari njoftoi deputetët për ndërprerjen e seancës, duke paralajmëruar vazhdimin e saj, të shtunën, në orën 12:00”, thuhet në njoftimin e Kuvendit.