Ministri i jashtëm i Serbisë Ivica Daçiq ka pretenduar se deri në fund të vitit “katër deri pesë shtete në botë do të tërheqin njohjet e pavarësisë së Kosovës”.
Duke reaguar në deklaratën e emisarit amerikan Matthew Palmer për rrezikun që Serbia mund të ballafaqohet me sanksione për shkak të blerjes së armatimit rus, ministri serb ka deklaruar për televizionin serb “Happy” se nuk ka bazë për futjen e sanksioneve sepse, siç ka pretenduar, “ne nuk jemi budallenj dhe e dimë se çfarë kemi të lejuar”.
Duke komentuar pretendimet se është në kontakt me liderin e Lëvizjes së Qytetarëve të Lirë (LQL) Sergej Trifunoviq dhe se është i gatshëm të bashkëpunojë me opozitën, Daçiq ka pretenduar se esenca e këtyre akuzave është “që të thyhet rezistenca serbe kur është fjala për Kosovën”.
“Kjo është temë e parëndësishme. Kush është ai Sergej Trifunoviq që unë t’i arsyetohem atij? Është e qartë se plani është që gjithë ky front të drejtohet kah ajo që të thyhet rezistenca jonë kur është fjala për Kosovën. Ata po punojnë kundër Vuçiqit e jo kundër meje”, ka pretenduar Daçiq.
