Sekretarja e Përgjithshme e Partisë Demokratike të Kosovës (PDK), Vlora Çitaku, ka deklaruar se raporti i Kosovës me Shtetet e Bashkuara të Amerikës nuk ka qenë dhe nuk duhet të jetë transaksional.

Duke iu referuar tarifave që aktualisht ekzistojnë ndaj produkteve amerikane, Çitaku i ka quajtur ato një mbetje të së kaluarës administrative të UNMIK-ut, që nuk reflektuan frymën e aleancës mes dy vendeve.

Ajo ka premtuar se nëse PDK merr drejtimin e qeverisë, ato tarifa do të hiqen menjëherë.

“Ky nuk është vetëm një akt politik i mençur – është një hap drejt një ekonomie më të hapur, më të fuqishme dhe më konkurruese. Është një angazhim për partneritet të vërtetë, që i shërben qytetarëve tanë, bizneseve tona dhe zhvillimit të vendit”, ka theksuar ajo.

“Mbështetja që SHBA i ka dhënë Kosovës nuk matet me para. Ajo është ndërtuar mbi vlera të përbashkëta: liria, demokracia, dhe e drejta e popujve për të jetuar të lirë dhe të barabartë”, ka shkruar Çitaku në një status të saj.

Ajo ka theksuar se Kosova ka pasur një status të privilegjuar në tregun amerikan, duke theksuar se kjo është një dëshmi e respektit dhe besimit të Shteteve të Bashkuara ndaj Kosovës për dekada me radhë.

Për fund, Çitaku ka deklaruar se Kosova dhe SHBA nuk ndërtojnë vetëm marrëdhënie, por edhe të ardhmen së bashku.