Kryeministri Avdullah Hoti dhe presidenti i Serbisë, Aleksander Vuçiq, në Zyrën Ovale në Washington në prani të presidentit të Shteteve të Bashkuara të Amerikës janë pajtuar për një moratorium një vjeçar, ku Kosova s’do të kërkojë njohje të reja e anëtarësim në organizata ndërkombëtare dhe Serbia do të ndalojë fushatën e saj kundër pavarësisë së Kosovës.
Ambasadori amerikan në Prishtinë, Philip Kosnett, ka thënë se një pikë e tillë në marrëveshje është vendosur për të qetësuar dhe për të krijuar hapësirë ‘për frymëmarrje’ për palët, në mënyrë që të fokusohen në çështje ekonomike.
“Ky moratorium është bërë me qëllimin që të krijohet një hapësirë për frymëmarrje, dhe për t’u fokusuar në çështje ekonomike”, ka thënë sot ambasadori amerikan gjatë një bisede me gazetarë.
Diplomati amerikan gjithashtu ka treguar edhe pritjet e tij nga dialogu mes Kosovës dhe Serbisë pas një periudhe një vjeçare. Ai ka thënë se nëse Serbia dhe Kosova do ti qasen seriozisht procesit atëherë mund të ketë progres të prekshëm.
“Çfarë presim pas një viti. Ne besojmë që nëse Serbia dhe Kosova janë serioze në këtë proces atëherë do të ketë progres të prekshëm në fund të kësaj periudhe një vjeçare.
Por ne s’kemi një afat se kur mund të ndodh kjo apo ajo çështje, sepse varet nga shumë faktorë të ndryshëm.
Ne do të vazhdojmë të punojmë shumë fuqishëm për të identifikuar pengesat dhe për të vazhduar përpara”, ka thënë Kosnett.
Ai tutje ka thënë SHBA e sheh normalizimin e plotë të raporteve mes Kosovës dhe Serbisë si qëllim final të dialogut, derisa shton se nëse do të ketë progres në dialogun politik që drejton BE, atëherë ka thënë se mund të krijohet një momentum i jashtëzakonshëm në vitin e ardhshëm.
“Ne shohim se qëllimi final i bisedimeve në mes të Kosovës dhe Serbisë duhet të jetë normalizimi i plotë i raporteve, dhe jo vetëm atyre ekonomike. Por mendoj se nuk me ndihmon që të spekuloj se çfarë do të ndodh më 4 shtator të vitit 2021. Nëse dialogu i BE në pjesën e politikës krijon momentumin në vitin e ardhshëm, dhe unë besoj që do ta bëjnë për shkak të progresit në ekonomi, do të mund jemi në një pozicion të jashtëzakonshëm vitin tjetër”, ka thënë Kosnett ndër të tjera.
