Eugen Cakolli nga KDI, ka thënë se deputetët e rinj do të marrin rreth 750 euro bruto për gjashtë seancat e mbajtura nga 19 prilli, të cilat kanë zgjatur vetëm 39 minuta e 18 sekonda.

Cakolli në postimin e tij, ka bërë edhe një krahasim duke thënë se i kjo i bie që një deputet me 2 sekonda punë fiton aq sa një qytetar paguan për një bukë.

Postimi:

Që nga momenti i dhënies së betimit më 19 prill e deri më sot, janë mbajtur 6 seanca të Kuvendit. Këto seanca kanë zgjatur në total vetëm 39 minuta e 18 sekonda – apo 2,358 sekonda.

Për këtë “angazhim”, secili deputet do të marrë rreth 750€ pagë bruto. Kjo do të thotë se, secila minutë efektive e deputetit do t’i kushtojë taksapaguesve 18.93€, ndërsa çdo sekondë – 0.32€.

Për krahasim:

• Me 2 sekonda punë, një deputet fiton aq sa një qytetar paguan për një bukë (me çmimin e ri);

• Me 6 sekonda, fiton aq sa kushton një makiato me çmim të rritur në Prishtinë;

• Me 18 minuta punë, fiton aq sa është paga minimale në Kosovë.