Sekretari i Përgjithshëm i NATO’s, Mark Rutte, dënoi fuqishëm sulmin e Rusisë në Sumy të Ukrainës si “thjesht i egër” dhe “pjesë e një modeli të tmerrshëm të Rusisë që sulmon objektivat dhe infrastrukturën civile”, ndërsa siguroi presidentin ukrainas Volodymyr Zelenskyy për mbështetjen e vazhdueshme të NATO-s.

Në një deklaratë, të publikuar nga NATO, ai tha se “populli i Ukrainës meriton paqe të vërtetë dhe siguri reale në vendin e tyre. Në shtëpitë e tyre”, dhe tha se donte të shfrytëzonte vizitën e tij për të “pohuar… këtë mesazh të thjeshtë: NATO qëndron me Ukrainën”.

“E di gjithashtu se disa e kanë vënë në dyshim mbështetjen e NATO-s në dy muajt e fundit. Por le të mos ketë asnjë dyshim. Mbështetja jonë është e palëkundur”, tha ai, shkruan The Guardian, transmeton Gazeta Express.

Ai në fjalimin e tij tha se foli me Zelenskyn për “bisedimet e rëndësishme që presidenti Trump po udhëheq me Ukrainën si dhe me Rusinë për t’i dhënë fund luftës dhe për të siguruar një paqe të qëndrueshme”.

Ai pranoi se “këto diskutime nuk janë të lehta – jo më pak në vazhdën e kësaj dhune të tmerrshme – por ne të gjithë mbështesim shtytjen e presidentit Trump për paqe”.

“Pra, më lejoni t’i them përsëri – popullit të Ukrainës: Ne qëndrojmë me ju. Dhe mezi presim një ditë që burrat dhe gratë e guximshme të këtij vendi të jashtëzakonshëm të mund të gëzojnë lirinë pa frikë”, tha ai.