Lajme

Bekim Haxhiu: Qeveria “Kurti” s’po i sheh si heronj punëtorët shëndetësorë

Bekim Haxhiu: Qeveria “Kurti” s’po i sheh si heronj punëtorët shëndetësorë
17:26 | 02 Dhjetor 2021

Federata e Shëndetësisë së Kosovës sërish sot ka mbajtur grevë 8 orëshe.

Kërkesa e mantelbardhëve mbetet miratimi i Ligjit të Pagave i cili vite më parë është pezulluar nga Gjykata Kushtetuese.

Aktualisht nga Qeveria ende nuk kanë ndonjë përgjigje se kur do ta procedojnë në Kuvend.

Por ata po i përkrahë opozita. Deputeti i PDK-së, Bekim Haxhiu anëtar i Komisionit për Shëndetësi i quan plotësisht të arsyeshme kërkesat e tyre.

Haxhiu ka thënë për Front Online se është vet Qeveria që po i detyron të protestojnë profesionistët shëndetësorë pasi nuk u siguron pagë dinjitoze.

“Greva e Sindikatave të Shëndetësisë është plotësisht e arsyeshme, sepse Qeveria e Republikës së Kosovës u ka borxh punëtorëve shëndetësorë të cilët deri dje i ka quajtur heronj ndërsa sot i ka detyruar të protestojnë për realizimin e asaj që u takon, pra një pagë dinjitoze”, ka thënë Haxhiu.

Ai tutje ka thënë se Qeveria e udhëhequr nga Albin Kurti ka shkelur zotimin e tyre për paga të dinjitetshme.

“Qeveria nuk ka përmbushur zotimin ndaj punëtorëve shëndetësorë, pagat nuk janë rritur prej vitit 2014, ndërsa çmimet e konsumit janë shtrenjtuar shumë prej ati viti e deri më sot”, ka thënë Haxhiu.

Sipas deputetit Haxhiu, Ligji për Paga nuk do të procedohet në Kuvend, pasi Qeveria nuk e ka të planifikuar në agjendën e vet legjislative.

“Me agjendën legjislative Qeveria ka bërë një dështim të madh, ka planifikuar 198 ligje ndërsa në Kuvend ka proceduar vetëm 66 prej tyre, përfshi këtu edhe Ligjin e Pagave të cilin nuk e ka planifikuar fare në buxhetin”, ka thënë deputeti Haxhiu për Front Online.

Gjykata Kushtetuese e Kosovës e kishte shfuqizuar Ligjin për Paga të miratuar në vitin 2019.

Sipas Gjykatës, Ligji për Pagat në Sektorin Publik, në tërësinë e tij, nuk është në përputhshmëri me Kushtetutën. /Front Online/

 

Loja e madhe ka filluar nga 31 Janar dhe vazhdon deri me 2 Shkurt në Petrol Company

Të tjera