Njëra prej ndeshjeve më interesante në xhiron e 27-të në Superligën e Kosovës u zhvillua në Drenas.

Në stadiumin “Rexhep Rexhepi”, Feronikeli ishte nikoqir i Llapit, raporton FrontOnline.

Ndeshja në fjalë u mbyll me rezultat 4:0 në favor të Feronikelit.

Pas ndeshjes, trajneri i Llapit, Tahir Batatina është justifikuar për humbjen e sotme nga “Nikli”.

“Pjesën e parë kemi dominuar gjatë gjithë kohës, në pjesën e parë kemi pasur dy raste të 100% që t’i realizonim dy gola dhe të ishim shumë të qetë”, ka thënë Batatina në “ArtSport”.

“Për shkak të kushteve që janë në teren nuk kam udhëtuar me gjithë ekipin për shkak se vëmendja është në ndeshjen gjysmëfinale kundër Prishtinës. Djemtë e dhanë maksimumin edhe pse nuk është dashur t’i pranonim katër gola për ndeshjen që kemi bërë”, tregoi ai.

“Objektivi jonë është Kupa e Kosovës. Emri i Prishtinës është i madh, e dijë që Prishtina ka super skuadër dhe është skuadër shumë e fortë. I dimi pikat e forta dhe te dobëta të Prishtinës. Do ta japim maksimumin që të marrim rezultat pozitiv ne ndeshjen e parë që të mundomi që ndeshjen e dytë të kalojmë në finale. Besoj në skuadrën time, kam një skuadër që e duan Evropën. Por, gjithmonë duhet vlerësuar Prishtina. Përparësija jonë është se fokusi është vetëm në kupë, kurse Prishtina është duke luftuar në dy frone”, shtoi trajneri llapjan./FrontOnline/