×
  • Lajme
  • Lajme

    Bashkëpunimi Kosovë-SHBA dhe dialogu strategjik, vizita e të dërguarit të Amerikës për Ballkanin

    FrontOnline
    11 Tetor 2024

    I dërguari i Shteteve të Bashkuara për Ballkanin Perëndimor, Alexander Kasanof, u prit nga liderët e Kosovës, presidentja Vjosa Osmani dhe kryeministri Albin Kurti, në takime ndaras të enjten në Prishtinë.

    Pas takimit me Kasanofin në zyrën e saj, Osmani tha se Kosova ka nevojë për dialog strategjik me Shtetet e Bashkuara të Amerikës.

    “Në takimin me Kasanof, presidentja Osmani diskutoi edhe për mundësinë e thellimit të bashkëpunimit në fusha të ndryshme me interes të ndërsjellë, siç është fusha e mbrojtjes dhe sigurisë”, tha zyra e Osmanit në një njoftim për media.

    Shtetet e Bashkuara nuk kanë qenë të kënaqura me veprimet e autoriteteve kosovare në veriun e banuar me shumicë serbe gjatë këtij viti, duke thënë se ato kanë ndikuar në partneritetin mes dy vendeve.

    Uashingtoni i ka cilësuar si të “njëanshme” dhe të “pakoordinuara” vendimet e Qeverisë së udhëhequr nga kryeministri Albin Kurti në veri për ndalimin e dinarit serb, mbylljen e institucioneve paralele serbe dhe synimet për hapjen e urës mbi lumin Ibër.

    Kurti vazhdimisht këmbëngul se veprimet e Qeverisë së tij nuk janë të drejtuara kundër askujt, se ndjek Kushtetutën dhe ligjet e Kosovës dhe se marrëdhëniet me SHBA-në janë të mira, përkundër mospajtimeve për disa çështje.

    Pas takimit të enjten vonë, kryeministri Kurti shkroi në Facebook se me Kasanofin “trajtuam një gamë të gjerë temash, me fokus në fuqizimin e marrëdhënieve bilaterale, zgjerimit të bashkëpunimit të dyanshëm dhe sinergjinë në fusha me interes të përbashkët”.

    Ai tha se Shtetet e Bashkuara të Amerikës janë partneri dhe aleati kryesor i Kosovës.

    Zyra e Kurtit tha në një njoftim paraprakisht se kryeministri “trajtoi mundësitë e bashkëpunimit edhe me emisarin e ri Alexander Kasanof si dhe partnerët tanë evropianë pas zgjedhjeve të mbajtura dhe komisionarëve të rinj”.

    Kasanof po e viziton Kosovën për herë të parë si i dërguar amerikan për Ballkanin Perëndimor – pasi e pasoi Gabriel Escobarin – ku pritet të zhvillojë konsultime edhe me liderë të opozitës, shoqërinë civile dhe bizneset.

    Kasanof erdhi në Prishtinë pas një vizite në Serbi dhe në Bosnje e Hercegovinë gjatë kësaj jave.

    Ndërkohë, zyra e Kurtit tha se në takimin e tij me të dërguarin amerikan të enjten “u trajtua dhe dialogu me Serbinë, ku kryeministri shprehu konstruktivitetin e Kosovës në proces dhe nevojën për zbatimin e plotë dhe sa më parë të Marrëveshjes Bazike të Brukselit dhe Aneksit Implementues të Ohrit”.

    Kosova dhe Serbia janë në negociata për normalizimin e marrëdhënieve qysh në vitin 2011.

    Por, takim mes udhëheqësve të lartë nuk ka pasur për më shumë se një vit.

    Të dyja palët akuzojnë njëra-tjetrën për moszbatimin e marrëveshjeve të arritura deri më tash.

    Nga Rubrika
    Lajme12 Mars 2025
    Një lis ka rënë sonte në një hapësirë të kryeqytetit, si shkak i motit të ligë. Për pasojë sipas transmetuesit publik të...
    Lajme12 Mars 2025
    Ekrem Hyseni i LDK’së thotë se sot nuk është sulmuar vetëm fjala e lirë, por edhe vetë demokracia. Sipas tij, vetëm brenda...
    Lajme12 Mars 2025
    Ushtarët e aviacionit amerikan të caktuar në Komandën Rajonale në Lindje të misionit të KFOR të udhëhequr nga NATO, kryen një lëshim...
    Të tjera
    Lajme12 Mars 2025
    Kryetari i AAK-së, Ramush Haradinaj, i ka cilësuar si alarmante deklaratat e Sekretarit të Përgjithshëm të NATO-s në Kosovës, Mark Rutte. Haradinaj...
    Lajme12 Mars 2025
    Ish-deputeti i PDK-së, Hisen Berisha, ka kritikuar ashpër deklaratat e presidentes Vjosa Osmani, kryeministrit Albin Kurti , lidhur me prodhimin e municioneve...
    Lajme12 Mars 2025
    Ramush Haradinaj, kryetari i Aleancës për Ardhmërinë e Kosovës, në një intervistën ekskluzive për Rubikon, të parën pas publikimit të rezultateve, ka...
    Lajme12 Mars 2025
    Analisti politik, Shenoll Muharremi, ka thënë se përkundër gatishmërisë së deputetit Elbert Krasniqi për ta mbështetur Lëvizjen Vetëvendosje, kjo e fundit nuk...
    Bota/Rajoni12 Mars 2025
    Presidenti i Shteteve të Bashkuara të Amerikës, Donald Trump, i ka bërë thirrje Rusisë ta pranojë një armëpushim 30-ditor, duke e paralajmëruar...
    Lajme12 Mars 2025
    Drizan Shala, njohës i çështjeve të sigurisë, ka deklaruar  se Kosova ka mundësinë të prodhojë municione pas transformimit të Forcës së Sigurisë...

    FrontOnline, © 2025 Të gjitha të drejtat e rezervuara.