Vendimi i autoriteteve të Hong Kongut për t’i lejuar aktores hollivudiane Nicole Kidman një përjashtim nga rregullat e karantinës gjatë xhirimit të një seriali për jetën e emigrantëve të pasur, të financuar nga Amazon, ka shkaktuar zemërim publik, transmeton FrontOnline.
Qendra financiare kineze po zbaton disa nga masat më të rrepta të karantinës në botë, një qasje që ka mundësuar një numër të ulët të njerëzve të infektuar, por për shkak të saj, shumë banorë janë shkëputur nga të afërmit e tyre jashtë vendit për 18 muajt e fundit.
Vizitorët nga vendet me rrezik të lartë duhet të qëndrojnë në karantinë hoteliere për 21 ditë, ndërsa nga vendet me rrezik të ulët karantina e hoteleve zgjat 7 ditë me 7 ditë izolim më pas.
Por Kidman, 54 vjeç, u lejua të anashkalonte ato rregulla. Zyra e Tregtisë dhe Zhvillimit Ekonomik në Hong Kong ka konfirmuar se aktores australiane dhe anëtarëve të tjerë të ekuipazhit të filmit u lejohet një përjashtim për të “bërë një punë të caktuar profesionale”.
Këta individë duhet të kryejnë tre teste të koronavirusit brenda dy javësh nga mbërritja.
Tabloidet e qytetit kanë ndjekur Kidman tërë kohën që kur ajo fluturoi me një aeroplan privat të enjten nga Australia, duke përfshirë një blerje dy ditë pas mbërritjes dhe më vonë xhirimet në rrethin Sai Wan të qytetit.
Kidman është producente ekzekutive e shfaqjes Expats, bazuar në librin e Janice YK Lee të botuar në vitin 2016 për jetën e tre grave amerikane në qytet.
Grupi popullor i mbështetjes në Facebook për njerëzit në karantinë në Hong Kong është gjithashtu plot komente të zemëruara se sa banorë dhe të huaj nuk mund t’i shohin të afërmit e tyre jashtë vendit për gati dy vjet për shkak të rregullave.
Elizabeth Quat, një ligjvënëse pro-kineze, tha se ishte “e shqetësuar për përjashtimin në rregullat e karantinës të dhëna nga autoritetet për aktoren Nicole Kidman” dhe se kishte marrë shumë ankesa nga banorët e Hong Kongut./FrontOnline/
