Profesori i të drejtës kushtetuese, Arsim Bajrami, thotë se Përfaqësuesi i Posaçëm i Bashkimit Europian për dialogun Kosovë-Serbi, Miroslav Lajçak, me kërkesën e tij për ndryshimin e Kushtetutës së Kosovës e ka shpalosur një të fshehtë të Bashkimit Evropian.

Bajrami thekson se tani kur korrigjimi i kufijve nuk kërkohet, Bashkimi Europian po e kërkon shpëtimin tek Asociacioni.

“Ai ka zbuluar fshehtësinë e BE’së në dialog. Haptazi po shihet se tani kompromisi nuk po kërkohet te ideja e korrigjimit të kufijve – tani po kërkohet shpëtimi te Asociacioni”, tha Bajrami.

“Lajçak po e shpreh qëndrimin e BE’së se do të bëhet një trysni ndaj palës kosovare që ta pranojë një asociacion për ta arritur cakun – të ketë në dy anët lëshime dhe kompromise”, shtoi ai.

“Pala kosovare e ka të limituar procesin e dialogut. Asnjë lider i Kosovës nuk do të lejonte të shkelet Kushtetuta. Ne duhet shohim se ndoshta kemi bërë gabim që se kemi kryer asociacion para 5 vjetëve. Menjëherë pas vendimit të Gjykatës Kushtetuese është dashur që të përmbyllet kjo temë”, tha Bajrami për KlanKosova.

“Duke mos e bërë këtë, ne tash e kemi lënë në dorë të BE’së dhe ajo po shfrytëzon këtë. Ajo çfarë duhet bërë pala kosovare është sa më shpejt të hartojë statusin e asociacionit. Formimi i asociacionit është një obligim ndërkombëtar – duhet miratuar statuti dhe duhet të jetë në përputhje më Kushtetutën”, tha Bajrami.