Ditë më parë nënkryetari i Partisë Demokratike të Kosovës, Sami Lushtaku deklaroi për FrontOnline se PDK bën koalicion me VV-në, vetëm nëse Albin Kurti, nuk është në krye të saj.
“Partia Demokratike ka vendosur që të shkojë e vetme në zgjedhje. Unë së paku me opinionin që e kam jo. Unë nuk mundem me thënë për momentin asgjë, ata kanë thënë se nëse nuk është Hashim Thaçi dhe Kadri Veseli ne kemi mundësi me bë koalicion, edhe ne i themi Vetëvendosjes pa Albin Kurtin edhe ne jemi të gatshëm me hy me Vetëvendosjen”, ka thënë Lushtaku për Front Online.
Por, deklaratave të tij i është kundërpërgjigjur zyrtari i Lëvizjes Vetëvendosje, Agim Bahtiri.
Bahtiri, për FrontOnline, ka thënë se asnjëherë nuk do të bëjnë koalicion me PDK-në.
“Kurrë në jetë”, ka thënë shkurt Bahtiri, për FrontOnline.
Sipas Bahtirit, Sami Lushtaku mund të qeverisë me një grup të vetin vetëm në Skenderaj, duke shtuar se nuk e kanë lutur kurrë PDK-në që të bëjë koalicion me VV-në.
“Albin Kurti do ti prin pandalshëm qytetarëve të Republikës së Kosovës dhe Sami Lushtaku mund të qeverisë vetëm me një grup të vetin në Skenderaj dhe asgjë më shumë dhe ai nuk mundet me na përcaktua neve sepse nuk e ka lut askush atë, dhe nuk do ta lusim asnjëherë dhe nuk ka nevojë kurrë me bë koalicion me Lëvizjen Vetëvendosje”, ka deklaruar Bahtiri, për FrontOnline.
Bahtiri, ka thënë se Lëvizja Vetëvendosje është shumë e fuqishme dhe pa koalicion do të qeverisë vendin.
Gjykata Kushtetuese ka nxjerr aktgjykim pro kërkesës së Lëvizjes Vetëvendosje për shpalljen të pavlefshëm votimin në Kuvendin e Kosovës për zgjedhjen e Qeverisë Hoti më 3 qershor, pasi për këtë qeveri kishte votuar edhe deputeti Etem Arifi, i cili kishte një aktgjykim përfundimtar nga Gjykata e Apelit.
Gjykata Kushtetuese ka hedhur poshtë votën e deputetit Etem Arifi dhe ka urdhëruar u.d presidenten Vjosa Osmani, që të shpallë zgjedhjet e parakohshme në afat prej 40 ditësh./FrontOnline/
