Punët me një tender nuk i kanë shkuar siç duhet komunës së Fushë Kosovës. Ajo kishte planfikuar të angazhonte një kompani për asgjësimin e disa mbetjeve mjekësore (shiringa, dorëza, ampulla, fasha) në sasi 8000 kg dhe disa barnave me afat të skaduar, 2500 kg. Por, shkatërrimi i tyre do të shtyhet. Kjo shkaku i ankesave ndaj njëra-tjetrës të kompanive garuese e edhe vetë “pishmanllakut” të Zyrës së Prokurimit në këtë komunë. Lënda ka përfunduar në Gjykatën e Tenderëve dhe nuk dihet se kur do të marrë epilog. Bordit aktual të këtij organi i ka skaduar mandati dhe deri në zgjedhjen e atij të riut s`mund të shqyrtohet asnjë ankesë.

Si nisi gjithçka?

Tenderin Komuna e Fushë Kosovës e hapi më 3 qershor të këtij viti. Për fitimin e tij kishin aplikuar dy kompani, “Metbat” dhe “Princi Company”. E para ofertoi me 29 mijë e 400 euro. E dyta me 31 mijë e 400 sosh.

Gjatë përzgjedhjes, komuna e Fushë Kosovës kishte vendosur ta shpërblejë me kontratë kompaninë “Princi”, ani se oferta e saj ishte për 2 mijë euro më e shtrenjtë sesa ajo e “Metbat”. Megjithatë, shkaku që kjo e fundit u eleminua nga gara si e papërgjegjshme, ajo mbeti e vetme në garë. Fitoi.

Komuna e Fushë Kosovës ndër arsyet eliminuese që ia përmendi kompanisë “Metbat” ishte se ajo nuk i kishte përmbushur kërkesat e sigurisë së tenderit, as si duhet formularin e paraqitjes, njëjtë siç nuk kishte vepruar edhe me kërkesat e vlefshmërisë së tenderit. Për më tepër, Zyra e Prokurimit në këtë komunë, ofertën e këtij operatori e konsideroi si abnormalisht të ulët. Krahas tyre, sipas saj, kompania “Metbat” nuk kishte dorëzuar certifikatën se nuk është diskualifikuar nga ndonjë masë e nenit 65 të LPP e as një tjetër të tillë që do të dëshmonte përshtatshmërinë profesionale të saj.

Kur u duk se gjithçka mbaroi, biznesi “Metbat” u rishfaq përsëri. Bëri ankesë në Zyrën e Prokurimit të Fushë Kosovës, e cila pavarësisht se ia gjeti një “mal” shkeljesh në herën e parë, ia aprovoi atë dhe vendosi ta shpërblejë me tender.

Ky vendim, që ishte i dyti, shfuqizoi vendimin e mëparshëm, atë të parin, ku si kompani fituese ishte shpallur “Prinici”. Kjo e fundit nuk u pajtua asesi dhe bëri ankesë, prapë në komunën e Fushë Kosovës. Përgjigjja që mori ishte refuzuese, andaj drejtuesit e kompanisë eliminuese “Princi” ankesën e çuan te Organi Shqyrtues i Prokurimit apo sic njihet ndryshe Gjykata e Tenderëve. Aty, ata, paraqitën 6 nga shkeljet të cilat vlerësuan se i bënë rivalët e tyre, drejtuesit e “MetBat“. Ndër to edhe ajo se këta të fundit nuk dëshmuan se kanë kryer me sukses asgjësime të kësaj natyre në tri vitet e fundit, gjë që kërkohej në tender.

Shkaku që lënda ka përfunduar në Organin Shqyrtues të Prokurimit, Zyra e Prokurimit në Fushë Kosovë e ka pezulluar aktivitetin për këtë tender.

Gjykata e Tenderëve nuk dihet se kur do të marrë vendim për të, meqë bordit aktual të saj i ka skaduar afati dhe deri në zgjedhjen e atij të riut ky organ s`mund të shqyrtojë asnjë ankesë.