Argjentina siguroi kualifikimin në Kupën e Botës 2026 në mënyrën më të mirë të mundshme, duke mposhtur rivalët e përjetshëm, Brazilin, me rezultatin 4-1 në “Estadio Monumental”. Ky ishte suksesi i tyre i tetë në nëntë ndeshje kualifikuese në shtëpi.

Pjesa e parë dhuroi spektakël, me katër gola të shënuar nga vetëm pesë gjuajtje.

Argjentinasit, të motivuar nga lajmi se e kishin siguruar kualifikimin edhe para se të niste ndeshja, kaluan në avantazh që në minutën e pestë.

Thiago Almada shërbeu bukur për Julián Álvarez në zonë, i cili e dërgoi topin në rrjetë me një prekje të lehtë. Vetëm pak minuta më vonë, Nahuel Molina harkoi në zonë për Enzo Fernández, i cili e shtyu topin në rrjetë për golin e dytë të shpejtë të vendasve.

Brazili reagoi falë një gabimi të Cristian Romero, i cili vonoi me topin dhe pasimi i tij u kap nga Matheus Cunha. Sulmuesi brazilian nuk fali dhe shënoi në cepin e poshtëm të portës, duke bërë që të dyja skuadrat të shënonin në një përballje mes tyre për herë të parë pas nëntë ndeshjesh.

Ky mbeti i vetmi rast i Brazilit në pjesën e parë, pasi Argentina dominoi lojën. Almada ishte pranë golit të tretë për vendasit, por goditja e tij me të majtën u devijua mbi traversë nga portieri Bento.

Gjithsesi, goli i tretë erdhi para përfundimit të pjesës së parë, kur Fernández asistoi për mesfushorin e Liverpoolit, Alexis Mac Allister, i cili e mposhti portierin Bento me një prekje të saktë.

Në fillimin e pjesës së dytë, Álvarez u përpoq të shënonte një tjetër gol me një parabollë të zgjuar, por Bento e devijoi mbi traversë.

Fernández krijoi një tjetër rast të rrezikshëm pas një ore lojë, kur harkoi në zonë për Nicolás Tagliafico, por mbrojtësi goditi mbi portë.

Megjithatë, Tagliafico nuk doli pa një asist, pasi pasimi i tij në zonë gjeti Giuliano Simeone, i cili realizoi golin e tij të parë me kombëtaren argjentinase, duke shënuar nga një kënd i vështirë, me topin që preku traversën para se të përfundonte në rrjetë.

Brazili u dorëzua plotësisht, megjithatë Raphinha ishte pranë një goli të ngushëllimit, kur gjuajtja e tij nga goditja e dënimit preku pjesën e sipërme të traversës.

Argentina madje pati mundësinë të shënonte edhe golin e pestë, por Bento ndali një goditje nga distanca të Leandro Paredes në minutat e fundit.

Me këtë fitore, Argentina forcon kryesimin në tabelën e kualifikimeve të CONMEBOL për Kupën e Botës, ndërsa Brazili zbret në vendin e katërt, duke i dhënë fund serisë prej pesë ndeshjesh pa humbje në eliminatore./Express