Të gjendur në situatë pandemie, me shumë vështirësi edhe qytetarët e komunës së Gjakovës po përballen çdo ditë me pasojat, sidomos me ato ekonomike, që ka shkaktuar kjo situatë.
Në kohën kur humanistët, shoqatat, diaspora dhe njerëzit e vullnetit të mirë po mobilizohen që me pako ushqimore t’u dalin në ndihmë familjeve skamnore, është kryetari i Komunës së Gjakovës, Ardian Gjini, ai i cili së fundi e ka konsideruar si të panevojshëm kontigjentin e ndihmave në ushqime për familjet skamnore të Gjakovës.
Ndihmat në ushqime janë siguruar nga ish-deputeti dhe këngëtari kosovar Labinot Tahiri, i cili permes një videoxhirimi ka bërë të ditur se kryetari i Komunës së Gjakovës, Ardian Gjini, i ka cilësuar si të panevojshme këto ndihma për qytetarët e tij.
Alternativa nuk ka bërë reagime publike në këtë kohë pandemie, por në momentin që kuptuam se kryetari Gjini ka shkuar deri në pikën që të refuzojë ndihma për qytetarët e tij, atëherë kemi konsideruar që këtij kryetari duhet rikujtuar përgjegjësinë që ka ndaj çdo qytetari, të pasur e të varfër, pa dallim etnie, feje ose vendbanimi.
Kryetari Gjini duhet ta dijë se në Zyrën e Mirëqenies Sociale i ka të paraqitura zyrtarisht rastet skamnore, ku nëse përfshihen edhe rastet që janë në Qendrën për Punë Sociale dhe në Zyrën e Komuniteteve, shifra e familjeve skamnore në komunën e Gjakovës arrin mbi 2000 familje.
Me gjithë këtë numër t’u thuash humanistëve dhe njerëzve vullnetmirë që komuna e Gjakovës nuk ka nevojë për ndihma është absurditet, të cilin vetëm Ardian Gjini e prodhon në kohën e një pandemie globale.
Përpos kësaj, qeverisja lokale në Gjakovë ka dështuar në menagjimin e situatës së krijuar, sidomos në mungesë të përpjekjes për të përpiluar një pako ekonomike, me ç’rast do të përfitojnë puntorët e ndërmarrjeve publike lokale, të cilët çdo ditë janë në krye të detyrës, sidomos ata të kompanisë rajonale të mbeturinave “Çabrati”, bizneset e vogla të komunës së Gjakovës, familjet skamnore dhe shumë sektorë tjerë të rëndësishëm.
Alternativa në Gjakovë falënderon të gjithë donatorët dhe humanistët që po vazhdojnë të ndihmojnë familjet skamnore dhe në rast se hasin në pengesa të llojit si ky i sotmi nga kryetari i Komunës, atëherë me përgjegjësi të plotë u premtojmë organizatave dhe individëve që në çdo kohë jemi në gjendje t’i pajisim me listat e familjeve në nevojë e pse jo edhe të asistojmë pa asnjë qëllim politik në misionin e tyre human.
