Agjencioni kundër Korrupsionit (AKK) ditë më parë ka nxjerrë një opinion për tenderin: “Furnizimi i institucioneve kërkimore, shkencore me pajisje laboratorike”, ku palë kontraktuese është Ministria e Arsimit, Shkencës dhe Teknologjisë (MASHT), raporton Portali “Front Online”.
AKK lidhur me këtë tender ka konstatuar së është shkelur neni, 7 Barazia në trajtim dhe jo-diskriminim, neni 27 Dosja e tenderit si dhe neni 69 Aftësitë teknike dhe profesionale të Ligjit për Prokurim Publik.
Në opinionin e AKK- thuhet se në bazë të dokumenteve që kanë nxjerrë nga Sistemi Elektronik i Prokurimit kanë konstatuar se autoriteti kontraktues, për këtë aktivitet të prokurimit ka paraparë procedurën e hapur, kontratë publike kornizë 12 muaj, të llojit furnizim, me vlerë të mesme të parashikuar 50,000 euro.
Sipas opinionit të AKK, kërkesa e MASHT se “ Operatori ekonomik duhet të ofrojë dëshmi se ka përfunduar me sukses së paku tri kontrata të natyrës së ngjashme në tri vitet e shkuara nga data e publikimit të njoftimit të realizuara minimumi ne vlerë prej 75,000,00 euro”, nuk është në pajtim me dispozitat e Ligjit në fuqi për prokurimin publik, përkatësisht me nenin 69, raporton mes tjerash “Front Online”.
Sipas këtij neni, paragrafi 2.1, parashihet se”Listën me të cilën specifikohen të gjitha furnizimet kryesore të rëndësishme të operatorit ekonomik të realizuar në tri vitet e shkuara, duke saktësuar produktet e furnizuara, shumën e kontratës, datën dhe pranuesit’ (i) kur furnizimi është bërë për një autoritet publik në Kosovës ose në një vend tjetër, për dëshmi të këtij livrimi shërben kopja e certifikatës të rëndësishme të lëshuar ose të bashkënënshkruar nga autoriteti i tillë; (ii) kur furnizimi është bërë për një blerës privat, për dëshmi të këtij livrimi shërben kopja e çdo dokumenti të nënshkruar nga blerësi dhe evidentimi i livrimit të tillë.
Me këtë rast AKK ka konsideruar se autoriteti kontraktues në këtë rast Ministria e Arsimit nuk ka të drejt të bëjë kufizimin e numrit të kontratave dhe referencave të caktuar.
Sipas AKK e rëndësishme për autoritetin kontraktues është që të vërtetoj se operatorët ekonomik përmbushin vlerën minimale e cila është kërkuar nga ana e autoritetit kontraktues pavarësisht numrit të kontratave dhe referencave, e jo si në rastin konkret ku është kërkuar numri i kontratave në vlerë të caktuar. /Front Online/
