Së paku katër persona kanë vdekur pasi një anije greke me naftë u përplas me një barkë turke të peshkimit të mërkurën në ujërat e Detit Mesdhe.
Zyra e guvernatorit në provincën jugore turke, Adana, tha se deri më tani janë nxjerrë trupat e katër prej pesë personave që ndodheshin në barkën e peshkimit, shkruan Anadolu.
Aksidenti ndodhi 15 milje detare larg distriktit Karatas të Adanas në orën 5 e 50 minuta të mëngjesit sipas kohës lokale, njoftoi më herët roja bregdetare turke, duke shtuar se kanë nisur përpjekjet për gjetjen e trupave të personave të zhdukur.
Zëvendësdrejtori i Korporatës së Peshkatarëve në Mersin, Ramazan Kaya, i tha agjencisë Anadolu se barka turke ishte nisur nga Mersini për peshkim, transmeton Gazeta Express.
Ai shtoi se në mesin e personave që ndodheshin në barkë ishin kapiteni Metin Buten, peshkatarët Fevzi Yardimci, Recep Yildiz dhe Volkan Vural si dhe një shtetas sirian, i quajtur Muhammad Layla.
“Pas aksidentit, barka u përmbys për shkak të presionit të ajrit. Morëm vesh që anija greke dhe ekipet e rojes bregdetare greke ishin të parat që reaguan në këtë rast”, tha Kaya, duke shprehur dhimbje për vdekjet.
