Partitë politike në Kosovë ende nuk kanë arritur të gjejnë një zgjidhje për postin e presidentit.

Madje, për këtë post po ka mospajtime në koalicionin që qeverisë me vendin.

E për këtë, kryeministri Hoti ka paralajmëruar një tryezë të përbashkët të partive për t’u dakorduar për postin e të parit të shtetit.Mirëpo, kjo ftesë po shihet si formale nga analistë politikë.

Shemsi Jashari ka thënë se kryeministri Hoti, sipas tij, nuk ka fuqi për zgjedhur çështjen madhore për presidentin e vendit.

“Ftesa e Hotit është vetëm formale për të konsumuar një veprim ngase të gjithë të dinë se Hoti nuk ka fuqi politike për të vendosur e as arritur një marrëveshje për çështje të mëdha. Ai e ka problem menaxhimin me koalicionin qeverisës, e jo të ketë rol në arritjen e një kompromisi për çështjen e presidentit. Si në rastin e votimit të pakos ekonomike ashtu edhe në caktimin e presidentit vendimtare është PDK dhe dakordimi me të se kush do të bëhet president apo kur do të shkohet në zgjedhjet e parakohshme”, vlerëson ai.Jashari ka shtuar se të gjitha partitë do të duheshin të pajtohet që në krye të shtetit të vihet një president konsensual“Mendoj se më e mira do të ishte që partitë të dakordohen për një emër konsensual për president të vendit dhe në zgjedhje të mos shkohet për shkak të presidentit, pasi prapë pas zgjedhjeve do ta kemi situatën e njëjtë kur kërkohet kompromisi pasi asnjë subjekt si i vetëm nuk mund të siguroj shumicën për të zgjedhur një president vendi”, thotë ai për Blic.

Ftesën për këtë tryezë e ka refuzuar Lëvizja Vetëvendosje ende pa u thirrur zyrtarisht nga kryeministri i vendit, Avdullah Hoti.Partia e Albin Kurtit fillimisht ka kërkuar që të ketë zgjedhje të reja nacionale, e më pas nga Kuvendi i ri të zgjidhet edhe i pari i shtetit.
Në një prononcim për GazetaBlic, zëdhënësi i VV-së, Përparim Kryeziu ka thënë se pozita e presidentit të Kosovës nuk është e lirë, pasi që siç është shprehur ai, ajo pozitë ushtrohet nga u.d., e presidentit Vjosa Osmani, ashtu edhe siç e sheh Kushtetuta e Kosovës.Kryeziu ka deklaruar se Kosovës, sipas tij, i duhet një president unifikues dhe jopartiak.“Ndryshe, me një kuvend të vjetër me vullnet të deformuar politik, presidenti i radhës nuk ka se si mos të jetë vetëm pazar i partive të vjetra politike. Kurse ne besojmë që vendit i duhet një president jopartiak, e unifikues. Një president partiak e përçarës e kemi pas deri së fundmi. Nuk besoj që kemi nevojë edhe për një të tillë”, ka thënë ai.Ndërkohë, të enjten, kryeministri i Kosovës, Avdullah Hoti, ka thënë se shumë shpejt do të mblidhen në një tryezë të përbashkët e partive politike për të biseduar për çështjen e presidentit.Për këtë pozitë janë shpallur disa vetë-kandidatura, derisa këtë publikisht e ka thënë edhe kreu i AAK-së, Ramush Haradinaj, i cili njëkohësisht është edhe partner kryesor në Qeverinë Hoti.Haradinaj ka “kërcënuar” se nëse nuk bëhet president i Kosovës, vendi siç ka thënë ai, do të shkojë zgjedhje të parakohshme.