Kreu i BDI-së, Ali Ahmeti, ka udhëtuar drejt Tiranës ku edhe është takuar me presidentin e Shqipërisë, Bajram Begaj. Ahmeti ka njoftuar se në këtë takim kanë diskutuar për shqetësimet rreth zhvillimeve aktuale si në Maqedoni të Veriut poashtu edhe në rajon.

Sipas Ahmetit, gjërat s’janë duke ecur në drejtimin e duhur.

Ndamë shqetësimin e përbashkët se zhvillimet aktuale, si në vend ashtu edhe në rajon, nuk po ecin në drejtimin e duhur. Megjithatë, besoj dhe konfirmova bashkë me Presidentin Begaj se Republika e Maqedonisë së Veriut ka kapacitetet e nevojshme për të tejkaluar sfidat me të cilat përballet. Ajo që mungon nuk është aftësia, por vullneti – vullnet që duhet të jetë i ndërsjellë”, ka shkruar Ahmeti.

Ai ka thënë se në radhë të parë, duhet të përmirësohen marrëdhëniet ndëretnike dhe të mbrohen arritjet e frymës së Marrëveshjes Paqësore të Ohrit.

“Po ashtu, duhet të respektohen edhe marrëveshjet e tjera të rëndësishme si ajo e Prespës dhe marrëveshjet për fqinjësi të mirë, që hapin rrugën për një të ardhme të përbashkët evropiane”, ka shtuar tutje Ali Ahmeti.

“Ramë dakord se e ardhmja e rajonit është në stabilitetin e qëndrueshëm dhe integrimin e plotë në Bashkimin Evropian. Paqja nuk mund të jetë funksionale në mënyrë parciale – duhet të jetë gjithëpërfshirëse, duke përfshirë të gjitha vendet dhe popujt e Ballkanit Perëndimor në frymën e pajtimit dhe bashkëpunimit”, shprehet ai