Kryetari i Prishtinës, Shpend Ahmeti ka përkujtuar aktivistin e Lëvizjes Vetëvendosje, Astrit Deharin, për të cilin ka thënë se ishte një aktivist shembullor.
Ahmeti përmes një shkrimi në Facebook ka shkruar se vdekja e tij në burgun e Prizrenit ku edhe ishte mbajtur padrejtësisht, mbetet e pasqaruar, shkruan “Front Online”.
Ndryshe, sot është trevjetori i vdekjes së Astrit Deharit, kryetari i Lëvizjes Vetëvendosje, Albin Kurti dhe kryesia e këtij subjekti politik, familjarë e miq të Deharit kanë bërë homazhe te varri i të ndjerit prej ku u kërkua që autorët që ia morën jetën aktivistit të VV-së, të vihen para drejtësisë.
Postimi i plotë:
Astrit Dehari ishte aktivist politik, aktivist i LVV, student shembullor dhe për një kohë edhe punëtor shembullor në Komunën e Prishtinës.
Përveç temave të drejtorisë së shëndetësisë, vinte te unë në zyre gjithmonë kur kishte takuar ndonjë qytetar në hall nga gjendja ekonomiko-sociale dhe mendonte se duhet ti ndihmojmë. E shihte si qëllim jetësor ndihmën për njerëzit në nevojë.
Vdekja e tij në burgun e Prizrenit ku ishte dërguar dhe mbajtur padrejtësisht mbetet e pasqaruar. Dhe kjo është barrë jo vetëm për pushtetin e atëhershëm politik e administrativ, por barrë për secilin qytetar të Republikës. Barra dhe përgjegjësia vecse do të shtohen deri të zbulohen krejt rrethanat dhe krejt përgjegjësit e asaj çfarë ka ndodhur.
Por, sot, në tre vjetorin e vdekjes së hershme të Astritit, ta kujtojmë Astritin për njeriun që ishte, modest, punëtor, zë i butë për miqtë, e zë i fortë për drejtësi e barazi.
Shpirti ndjesë i past!
#drejtesiperastritin/Front Online/
