Kryetari i Mitrovicës, Agim Bahtiri së bashku me disa aktivistë të AKR-së në këtë komunë, i janë bashkuar zyrtarisht Lëvizjes Vetëvendosje duke deklaruar se i pari i kësaj partie, duhet ta udhëheq Kosovën si kryeministër.

Kryetari i Lëvizjes Vetëvendosje, Albin Kurti tha se ai nuk është për herë të parë në Mitrovicë, e as Agim Bahtiri nuk është tani për herë të parë në Vetëvendosje, raporton Front Online.

“Mitrovia është më shumë se një qytet për shtetin e Kosovës, është qytet i punëtorëve dhe minatorëve, aty ku zhvillohet ekonomia dhe ku mbrohet shtetësia. Besoj që jemi me fat që e kemi kryetar Agim Bahtirin në Mitrovicë. Duke iu falënderuar qëndresës, sot ne nuk e kemi kufirin në Ibër. Bahtiri e ka dëshmuar se nuk e ka pushtetin për vete, por për Mitrovicën. “, ka deklaruar ai.

Në ceremoninë zyrtare të aderimit në VV, kryetari i Mitrovicës, Agim Bahtiri ka thënë se nuk synon poste apo pasuri nga politika, por “për të luftuar të keqen e SHIK-ut në Mitrovicë”.

“Qytetarët më kanë përkrahur dhe do të më përkrahin dhe do të jem kryetar i Mitrovicës deri në 2029-ën. Prej 2013-ës nuk e kam pasur mbrojtjen e qendrës për të mbrojtur një pëllëmbë të Mitrovicës dhe kjo më ka shtyrë që t’i bashkëngjitem një subjekti politik, që udhëhiqet nga një njeri prej të cilit kam gjetur përkrahje të vazhdueshme. Duke ditur vlerat e Albin Kurtit kam vendosur t’i bashkohem të vërtetës dhe të drejtës komplet me gjithë strukturën e AKR-së. Kujt tjetër mund t’ia besojmë territorin e Kosovës pos Albin Kurtit?”, tha ai.

Bahtiri tutje shtoi se “Agimi bashkë me juve flenë i qetë, kur e din që e ka kryeministër Albin Kurtin”./Front Online/