Kryetari i Federatës së Futbollit të Kosovës, Agim Ademi ka folur rreth situatës së fundit te kombëtarja e Kosovës, ku u përjashtuan tre futbollistë.

Ademi ka folur për “Top Channel”, ku ka bërë me dije se vendimi ka qenë ekskluzivisht i trajnerit (selektorit) Franco Foda, të cilin e ka respektuar FFK-ja.

“Pikë së pari duhet të respektohet rregullorja e cila u është komunikuar lojtarëve. Është shumë e rëndësishme për ekipin që ajo të respektohet. Përjashtimi i tyre ka qenë vendimi i trajnerit, pasi ata kanë dalë nga grumbullimi në orët e vona të natës. Sigurisht që ne kemi mbështetur mendimin e trajnerit, sepse kjo është dhe rregullorja”, tha Ademi.

Të dielën, FFK-ja kishte njoftuar se Edon Zhegrova, Arijanet Muric dhe Florent Muslija janë përjashtuar nga kombëtarja për këtë grumbullim.

Mbrëmë, Kosova e zhvilloi ndeshjen e fundit të këtij muaji, duke e mposhtur Qipron në udhëtim me rezultat bindës prej 4-0.

Ndeshjen e ardhshme, kombëtarja dardane do ta luajë më 12 tetor ndaj Lituanisë si mysafire./GazetaExpress/