Themeluesja e PSD-së, Kaqusha Jashari, po e konsideron si të pabazuar deklaratën e liderit të AAK-së, Ramush Haradinaj, se partia e saj mund të shkrihet tek partneri i koalicionit.

Shpeshherë në tubime fushate dilte në rend të parë, andaj edhe disa herë respektohej nga lideri i koalicionit AAK-PSD, Ramush Haradinaj.

Por ky respekt pak çon peshë krahas zhgënjimit që Kaqusha Jashari ka me partnerin e koalicionit AAK-ne.

Ajo nuk fitoi ulëse, duke qenë si kandidatja më e vjetër si deputete dhe po dyshon se brenda listës iu bën manipulime.

“Ne me AAK-në asgjë më nuk kemi. Kemi pas koalicion jo të suksesshëm, në tërësi bashkë si koalicion, por edhe plus jemi të zhgënjyer që brenda koalicionit me ish-deputetët tanë me kalu aq keq”, u shpreh Jashari.

Jashari është hatëruar edhe më shumë kur këto ditë kryetari i AAK-së, Haradinaj, u deklarua se PSD mund të shkrihet në AAK.

“Shkrirje jo vetëm në AAK, por në asnjë parti tjetër nuk vjen në konsiderim”, theksoi themeluesja e PSD-së, Kaqusha Jashari.