Deklaratat e zyrtarëve të Lidhjes Demokratike të Kosovës(LDK) se kryetari i tyre Isa Mustafa do të zgjidhet president i Kosovës në vitin 2021, pas skadimit të mandatit të presidentit aktual Hashim Thaçi, sipas analistëve politik mund edhe mos të jenë të reale.

Analisti Armend Muja ka thënë për “Front Online” se bisedimet që do të zhvillohen gjatë ditëve në vijim do të jenë më të vështirat, pasi që, do të flitet edhe për postin e presidentit të vendit.

Muja ka shtuar se  LDK-ja insiston në postin e presidentit, përderisa Lëvizja “Vetëvendosje” insiston për një president konsensual.

“Ajo që mund të themë aktualisht është se LDK-ja nuk do të mund ta merr postin e presidentit dhe njëkohësisht edhe postin e kryeparlamentarit”, ka sqaruar Muja.

Megjithatë, këto pengesa ai nuk i sheh si të patejkalueshme.

“Gjithsesi, unë nuk shoh pengesa te patejkalueshme. Kërkohet më shumë kreativitet në fazat e fundit të diskutimit mes VV-së dhe LDK-së. Mjerisht, koalicioni para-zgjedhor ndërmjet partive nuk u formua për shkak të insistimit për pozita politike. Megjithate, votuesi nuk e ka një mendim të njëjtë. Ka votuar për ndryshim e jo për teke specifike të secilit kandidat”, potencoi Muja për “Front Online”.

Ai ka folur edhe për bisedimet e deritanishme që janë zhvilluar mes përfaqësuesve të dy subjekteve politike.

“Të dy partitë kanë zgjedhur qasjen e dialogut (1) teknik – programor dhe (2) politik – ndarja e posteve sipas parimit negociues ‘gjera që pajtohemi ne fillim, ato që nuk pajtohemi ne fund”, shtoi ai.

Në anën tjetër, analisti Blerim Burjani, thotë se LVV-ja dhe LDK-ja janë duke humbur kohë në arritjen e një marrëveshje koalicioni, siç thotë ai, për dy arsye.

Sipas tij, fillimisht nuk dihet nëse qeveria e re do ta përfundoj mandatin katër vjeçar, por edhe nëse do të ketë pajtueshmëri të plotë për programin qeverisës mes partnerëve të koalicionit.  /Front Online/