Që nga 9 nëntori i vitit të kaluar pala kosovare dhe ajo serbe nuk kanë zhvilluar asnjë takim në kuadër të dialogut mes Kosovës e Serbisë, madje negociatat në mes të këtyre dy vendeve nuk pritet të fillojnë deri në pranverë të vitit të ardhshëm.

Profesori universitar dhe njohësi i çështjeve ndërkombëtare, Arben Fetoshi, është shprehur për “Zërin” se nëse nuk do të ketë zvarritje të mëtejme për formimin e Qeverisë së re, fillimi i dialogut mund të mos jetë i vonshëm, sepse rifillimi i dialogut është me prioritet për bashkësinë ndërkombëtare.

“Vizitat e shpeshtuara të zyrtarëve të lartë amerikanë në Prishtinë janë tregues i qartë i angazhimit për një marrëveshje pa vonesa. Sa i përket kohës, duket që faktorët evropianë mendojnë pak më ndryshe, por gjithsesi Marrëveshja për Normalizimin e Raporteve ndërmjet Kosovës dhe Serbisë ka kohë që përbën angazhimin kryesor ndërkombëtar në Ballkanin Perëndimor”, ka thënë Fetoshi.

Sipas tij, ajo që është me rëndësi për Kosovën aktualisht ka të bëjë me nevojën për pozicion të qartë dhe qasje sa më serioze ndaj këtij procesi, në mënyrë që Kosova të fitojë avantazh në raport me Serbinë.