Ministria e Shëndetësisë ka marrë vendim që nga nesër të administrojë dozën e tretë të vaksinës Anti-COVID. Vendimi për administrimin e dozës shtesë po pritet mirë nga njohës të shëndetësisë.
Kryetari i Odës së Mjekëve të Kosovës, Pleurat Sejdiu, këtë vendim e sheh të duhur dhe me kohë, teksa ka ftuar që të njëjtën ta marrin qytetarët dhe stafi shëndetësor.
“Unë mendoj se është vendim i duhur dhe me kohë, ku personalisht jam i interesuar tash e sa kohë sepse nuk mund të dalim prej standardeve që janë duke u zbatuar anë e mbanë botës, dhe unë besoj që populli në veçanti punëtorët shëndetësor duhet të vaksinohen me vaksinën e tretë”, tha Sejdiu.
Ndërkaq për refuzimin e qytetarëve për t’u vaksinuar, Sejdiu thotë se duhet të hyjnë në fuqi stimulimet dhe kushtëzimet për këtë kategori.
Ai thotë se e rëndësishme është mbikëqyrja e zbatimit të ligjit, këtë rast gastronomisë për ta kërkuar pasaportën e vaksinimit.
“Ajo çka është me rëndësi është që institucionet të cila e mbikëqyrin zbatimin e ligjit, duhet të jenë më aktive pasi që ne shohim se te gastronomia, ku duhet të tregosh pasaportën e vaksinimit, askush nuk e kërkon, dhe unë mendoj se është koha e fundit që kjo të bëhet, pasi që dihet shumë mirë se gjatë festave të fundvitit do të ketë mundësi të ekspolidimit të një fazë të pestë”, tha a.
Teksa ka folur për mundësinë që të shpërthejë ndonjë valë e re, Sejdiu thotë se punëtorët shëndetësor janë më të përgatitur.
Ndërkaq për uljen e rasteve pozitive, Sejdiu kërkon që mos të ketë relaksim po më shumë kujdes.
“Unë mendoj se jemi më të përgatitur në anën profesionale sesa herën e kaluar apo valët tjera, ku kemi mësuar më shumë, dhe në fushën e menaxhimit të pacientëve jemi shumë më të përgatitur, dhe besojmë se do ta përballojmë shumë më lehtë”, tha ai për EO.
