Kryeqyteti i Kosovës, Prishtina është në mesin e 21 komunave që shkojnë në balotazh në nëntor sipas rezultateve preliminare të zgjedhjeve lokale të 17 tetorit.
Arben Vitia i Lëvizjes Vetëvendosje doli i pari në garën për kryeqytetin, por nuk arriti të kaloj 50 përqindshin, prandaj do të ketë raund të dytë, në përballje me Përparim Ramën e Lidhjes Demokratike të Kosovës.
Vitia në raundin e parë mori 42.33 përqind të votave, kurse Kandidati i LDK-së për kryetar të Prishtinës 29.35 përqind.
Në raundin e parë, në kryeqytet dalja e votuesve ishte 44.88 përqind. 87 mijë e 959 qytetarë të Prishtinës shfrytëzuan të drejtën për të votuar me 17 tetor.
Por, ky numër mund të jetë më i vogël në raundin e dytë, bazuar në historikun e dy balotazheve të fundit në Prishtinë.
Në vitin 2017, 2 përqind e më pak e prishtinasve dolën në raundin e dytë të zgjedhjeve lokale, krahasuar me raundin e parë.
Në raundin e parë të zgjedhjeve lokale 2017, në Prishtinë, kishin dal 87 mijë e 442 qytetarëve për të votuar apo përkthyer në përqindje 47.57%, shkruan Gazeta Online Reporteri.net.
Ndërsa në raundin e dytë, dolën 83 mijë e 201 persona për të votuar në Prishtinë, apo 45.16 përqind.
Një skenar i njëjtë kishte ndodhur edhe në zgjedhjet e vitit 2013. Në raundin e parë dolën 86 mijë e 542 qytetarëve prishtinas për të votuar apo 51.06 përqind. Kurse, në raundin e dytë kishin dal 72 mijë e 22 votues apo 42.30 përqind.
Se a do të përsëritet skenari i njëjtë edhe kësaj radhe mbetet të shihet në shihet në nëntor.
