Kandidati i Vetëvendosjes për kryeministër, Albin Kurti, ka thënë se synimi për të marrë së paku 61 deputetë nuk është tendencë për kontroll të pushtetit.

“Populli po i druhet kapjes së shtetit dhe e dimë se si u realizua plani më 25 mars të vitit të kaluar kur u rrëzua qeveria në kulmin e pandemisë dhe punëvë të mira që bënim kundër korrupsionit. Po të mos ishte 25 marsi nuk do të kishte nevojë për 61 deputetë më 14 shkurt. Fakti që PAN-i u bë PLAN po na imponon që t’i kërkojmë 61 deputetë minimalisht në mënyrë që t’i zbatojmë reformat e shumëanshme për ta nxjerrë Kosovën nga kriza e shumëfishtë”.

Ai, në RTV Dukagjini, ka thënë se qytetarët vendosin nëse Vetëvendosja do t’i ketë tri postet kryesore të shtetit – atë të kryeministrit, presidentit dhe kryeparlamentarit.

“Qytetarët e vendosin për këtë gjë. Nuk e vendosim ne. Nuk ka subjekt i cili nuk aspiron shumicën. Deri tash kemi dashur që të dalim të parët dhe u pa se kjo nuk mjafton. Kemi thënë që duke pasë kryeministrin bëjmë reforma dhe u pa që nuk mjafton. Për t’i bërë ato reforma dhe për ta çkapur shtetin nga të korruptuarit e të gjitha ngjyrave është e domosdoshme që ne t’i kemi 61 deputetë e sipër”.

Cila është garancia që ky pushtet, që Albin Kurti po e synon, nuk do të devijojë në autoritarizëm?

“Ne jemi demokratë. Jemi të pakorruptuar dhe të pakorruptueshëm. Me qeverisjen tonë në ato 50 ditë e kemi dëshmuar që qytetarin e kemi në qendër”.