Deklaratat e zyrtarëve të lartë të VV-së për Presidentin po jepen, duke qenë të sigurt se do t’i fitojnë zgjedhjet parlmentare, e më pas se do të arrijnë ta zgjedhin Presidentin, për të cilin nevojitet 2/3 e votave të Kuvendit.

Një javë më parë, Gjykata Kushtetuese shpalli aktgjykimin për rrëzimin e Qeverisë Hoti dhe shkuarjen në zgjedhje të jashtëzakonshme, duke konstatuar se përbërja e kabinetit qeveritar s’i kishte marrë votat e nevojshme, pasi që ky organ e cilësoi si të pavlefshme votën e ish-deputetit të dënuar me burgim, Etem Arifi.

Anëtari i kryesisë së Lëvizjes Vetëvendosje, Glauk Konjufca, pas rrëzimit të Qeverisë në një emision televiziv tha se partia e tij do ta zgjedhë një president, që do t’i marrë votat e gjithë deputetëve të Kuvendit të Kosovës, përveç të Listës Serbe.

Por, por çfarë po e siguron LVV’në që deklaron se do të arrijë ta zgjedhë Presidentin?

Kur Konjufca u pyet se a mund të jetë dikush nga familja Jasharaj, ai tha se në këtë kohë nuk dëshiron të flasë me emra.

“Unë besoj fort që Lëvizja Vetëvendosje me mazhorancën në Kuvend të Kosovës ka me zgjedh një president i cili jo vetëm  që ka me i marrë votat e mazhorancës por po garantojë që do t’i marrë të gjithë votat e Kuvendit të Kosovës, përveç Listës Serbe. Nuk dua të spekuloj me emra. Me emra mendoj që nuk është momenti, për arsye se emra u lakuan fort, a vendi njëherë po shkon në zgjedhje për Qeveri”, tha Konjufca.

Anëtarja e kryesisë së VV-së, Arbërie Nagavci në një përgjigje për Gazetën Express tha se ende nuk e kanë diskutuar çështjen e Presidentit.

“Nuk kemi diskutuar ende çështjen e presidentit, me sa e di unë jo. Por njëherë vendi do të shkojë në zgjedhje për Qeverinë, pastaj diskutohet puna e presidentit”, tha Nagavci, derisa nuk dëshiroi të komentojë deklaratën e Konjufcës, pasi tha se nuk e kishte dëgjuar.

Megjithkëtë, Nagavci beson se nuk do të kenë vështirësi për zgjedhjen e presidentit.

“Besoj se do të jemi shumicë apsolute ne Kuvend dhe presim se nuk do të ketë vështirësi te tejkalueshme në zgjedhjen e presidentit/es”, shtoi Nagavci.

Anipse vetë është kandidat për president, lideri i Aleancë së Ardhmërisë së Kosovës, Ramush Haradinaj, ditë më parë ka thënë se do të heqë dorë nga kjo pozitë, nëse kandidohet dikush nga familja Jashari.

“Nëse kandidon dikush nga familja Jashari unë ja qes votën menjëherë. Ne tërë jetën e kemi mbështetë familjen Jashari. Unë heqi dorë menjëherë nëse është fjala për dikë nga familja Jashari”, kishte thënë Haradinaj.

Se familja Jashari janë të gatshëm për këtë pozitë e ka thënë kryetari i Skenderajt, Bekim Jashari.

Ai tha se nëse partitë gjejnë konsensus që dikush i familjes Jashari të jetë president i Kosovës, atëherë ata janë të gatshëm.

Pas dorëheqjes së Hashim Thaçit nga pozita e Presidentit, partitë politike nuk patën gatishmëri politike për organizimin e një tryeze të thirrur nga Lidhja Demokratike e Kosovës për të diskutuar rreth emrit të presidentit të ri të Kosovës.

Të gjitha subjektet politike parlamentare patën deklaruar se nuk e votojnë kandidatin e njëra-tjetrës për president, ndonëse akoma nuk janë propozuar emra, përveç kandidaturës se vetëshpallur së kryetarit të Aleancës për Ardhmërinë e Kosovës (AAK) për president, Ramush Haradinaj.

Posti i presidentit është duke u mbajtur nga u. d. e presidentes Vjosa Osmani që nga 5 nëntori, datë në të cilën ish-presidenti Hashim Thaçi dhe dorëheqje pas konfirmimit të aktakuzës nga Gjykata Speciale.