Ehat Miftaraj nga Instituti i Kosovës për Drejtësi (IKD), ka reaguar pas sulmit fizik ndaj gazetarit Valon Syla.

Miftaraj përmes një postimi në Facebook tha se ky nuk është vetëm sulm ndaj Valonit, por sulm ndaj fjalës së lirë, dhe ndaj çdo aktivisti dhe gazetari në Kosovë.

“Secili që ndihet i ofenduar nga fjalët apo qëndrimet e Valon Sylës mundet me inicu padi për fyerje në Gjykatë. Edhe pse nuk jam pajtuar me qëndrimet e Valon Syles lidhur me diasporën, nuk marr të drejtën të kontestoj të drejtën e tij për të shprehur një mendim.

Dhuna, sulmi nuk përkon me asnjë vlerë të demokracisë, përkundrazi është anarki dhe zbatim i ligjit të xhunglës”, ka shkruar Miftaraj.

Gazetari Valon Syla është sulmuar fizikisht para disa minutave në qendër të Prishtinës. Rastin për Gazetën Express e ka konfirmuar edhe zëdhënsja e Policisë së Kosovës për rajonin e Prishtinës, Flora Ahmeti, ku thanë se kanë dalur në vendin e ngjarjes.

Madje në rrjetet sociale kanë dalur pamjet e para, ku shihet se si gazetari Syla sulmohet nga një person me grushte.

Ky sulm fizik ndaj gazetarit Syla vjen pas shkrimeve të tij lidhur me fluksin e madh të mërgatës që kanë ardhur në Kosovë gjatë këtyre ditëve.