Në Komisionin Hetimor Parlamentar lidhur me procesin e privatizimit në Kosovë ka raportuar ish-anëtar i Bordit në Agjencinë Kosovare për Privatizim, Haxhi Arifi.

Ai tha se pas privatizimit të ndërmarrjeve publike punëtorët të cilët e kanë humbur vendin e punës nuk janë shpërblyer sa duhet.

Arifi tha se kanë kërkuar që kontributi i punëtorëve të paguhet 40% dhe jo siç ka qenë 20%.

Kjo kërkesë, sipas tij, ka rënë në vesh të shurdhër.

“Puntorët nuk janë shpërblyer sa duhet. 20 % ka qenë shumë e vogël. Edhe një propozim nga Kombet e Bashkuara thoshte se ky 20% të jetë 40%. Një gjë e tillë nuk ndodhi.Kërkesa ime ka qenë që ta kemi një program për punëtorët që mbesin pa punë pas procesit të privatizimit. Nga privatizimi nuk kanë marrë të gjithë punëtorët, dikush i ka marrë deri 100 mijë euro e dikush 200 euro”, tha ai para anëtarëve të komisionit.

Në rend të ditës janë tre dëshmitarë për t`u intervistuar për procesin e privatizimit në Kosovë.