Deputetët e Kuvendit të Kosovës nuk kanë pasur vendimmarrje për miratimin në parim të Projektligjit për të drejtën ndërkombëtare private. Ani pse u përkrahë nga shumica e grupeve parlamentare, në momentin e votimit nuk ishin 61 deputetë prezentë. Ndërkaq, Lëvizja Vetëvendosje duke adresuar kritika për këtë projektligj, shprehu qëndrim kundër.

Zëvendëskryeministri, Besnik Tahiri duke arsyetuar projektligjin tha se i njëjti do t’i shërbente shumë edhe diasporës shqiptare.

Tahiri: Ky projektligj do të zëvendësojë Ligjin aktual

“Ky projektligj do të zëvendësojë Ligjin aktual për zgjedhjen e konflikti të ligjeve me dispozita të shteteve të tjera i cili ka mbetur trashëgimi juridike pas shpërbërjes së Jugosllavisë. Ky projektligj do të sjell Kosovën në hap me trendë botërore në këtë fushë dhe njëjtën kohë është në përputhje me rregulloret kryesore me obligimet që janë nga BE dhe bazohet me akte moderne me të drejtën ndërkombëtare të Belgjikës dhe Zvicrës. Projektligji parasheh po ashtu rregulla dhe parime të përgjithshme se si Kosova do të zbatoj të drejtën e huaj duke rregulluar në mënyrë bashkëkohore këtë temë me gjitha institucionet kryesore. Po ashtu projektligji parasheh rregullat për caktimin e të drejtës kompetente në rast të martesës së personave dy shtetësive të ndryshme”, tha ai.

Por kundër u shpreh deputeti i LVV-së, Dimal Basha i cili kërkoi rikthimin e parimit të reciprocitetit në këtë projektligj.

Basha: Në këtë formë LVV nuk e përkrah

“Një ministër që nuk respekton parimin e reciprocitetin në projektligjet e veta, nuk do të gjejë asnjëherë mbështetjen tonë. Ndërsa nëse ministri vendos të tërheq dhe të kthejë parimin e reciprocitetit dhe rregullojë tek neni 52 ku flitet për adoptimin atëherë… përndryshe në këtë formë LVV- nuk e përkrahë”, tha ai.

Këtë e konsideroi të paarsyeshëm deputeti i LDK-së, Shkëmb Manaj.

Manaj: Ndryshimet e bëra e mundësojnë procedurën që të jetë e qartë

“Në këtë projektligj Ministria e Drejtësisë e ka hequr kërkesën për reciprocitet duke e zëvendësuar atë me disa rregulla më moderne. Pas sqarimeve që janë dhënë nga ekspertët kemi kuptuar se ndryshimet e bëra janë për ndryshim të jetës së qytetarëve tanë, duke iu mundësuar procedurën e qartë për njohjen e dhe ekzekutimit të këtyre vendimeve të huaja. Përafruar më shumë për njohje më të lehtë të vendimeve gjyqësore”, tha ai.

Për dallim nga LVV-ja, partia tjetër opozitare, PDK shprehu mbështetje projektligjit.

Thaçi-Dragusha; Ne do të përkrahim në parim

“Ne do të përkrahim në parim dhe do të votojmë në momentin kur vërejmë edhe koalicioni qeverisës ka vullnet të votojë. Të krijojë kushte dhe rrethana për të votuar në këtë fazë të parë”, tha ai.

Ndërkaq, nga AAK-ja, Teuta Haxhiu tha se në mes të dy leximeve do të japin kontributin e tyre për këtë projektligj.

Haxhiu: Grupi jonë parlamentar e përkrahë në parim

“Grupi jonë parlamentar e përkrahë në parim dhe normal në mes të dy leximeve do të japim kontributin tonë”, tha ajo.

Miratimin e këtij projektligji e kërkoi edhe shefi i grupit parlamentar të Nisma-AKR, Endrit Shala.

Shala: Ky projektligj është shumë i rëndësishëm

“Edhe ne si grup parlamentar duke ditur rëndësinë që e ka ky projektligj për qytetarin e republikës dhe shtetasit tanë që janë në diasporë. Por me këtë projektligj do t’i gëzojnë të drejtat e Kosovës mbi këtë e përkrahim këtë projektligj”, u shpreh ai