Deputetja boshnjake në Kuvendin e Kosovës Dude Balje përmes një shkrimi ka bërë demantin ndaj lajmeve të mediave serbe që raportuan se pjesëtarë të komunitetit serb janë sulmuar para vendosjes së banerit “Liria ka emër” në Graçanicë.

Ajo shkroi se frikën e tyre nuk duhet ta lidhin me komunitetet tjera joshumicë në Kosovë, duke thënë se komuniteti i saj është për bashkëjetesë me popullin shqiptar dhe secilin komunitet në Kosovë.

“Zyrtarit dhe dhe zyrtarëve të Sërbisë që kanë shprehur frikën nga jehona e banerëve ” Liria ka emër” si deputete e parlamentit të Republikës së Kosovës dhe kryetare e partisë SDU (Unioni social-demokratik) ju them që frikën e tyre mos ta ndërlidhen edhe me komunitetet tjera jo shqiptare në Kosovë”.

“Për komunitetin boshnjak flasim ne në emër tonin e jo zyrtarë të Serbisë që as nuk jetojnë në Kosovë. Ne jemi për bashkëjetesë dhe rrugëtim së bashku me popullin shqiptar dhe komunitetet tjera në shtetin tonë. Liria është për të gjithë dhe si e tillë nuk duhet t’i pengojë askujt përveç popujve që ja kanë frikën Lirisë!”.

Petar Petkoviq, drejtori i të ashtuquajturës Zyre për Kosovën në qeverinë serbe, dje në media serbe ka deklaruar se është sulmuar një serb “para tabelës që mbante emblemën e UÇK-së”.

Ai tha se serbi Zoran Trajkoviq u sulmua me shishe dhe gurë nga një grup shqiptarësh.

Megjithatë, Policia e Kosovës ende nuk ka konfirmuar për ndonjë sulm eventual. Klankosova.tv ka dërguar pyetjet në Polici dhe është në pritje të përgjigjes zyrtare rreth këtij rasti.