Qendra e Studentëve e Universitetit të Prishtinës (UP), shpall konkursin për pranimin e studentëve për banim në konvikte dhe për ushqim në mensë, për vitin akademik 2020/2021.

Konkursi do të jetë i hapur prej datës 29.10.2020 deri më datën 07.11.2020.

Siç thuhet në njoftim, studentët të cilët do të aplikojnë për strehim dhe ushqim në Qendrën e Studentëve, aplikimin mund ta bëjnë përmes sistemit online, në adresat zyrtare të QS-së, web faqes qs.rks-gov.net dhe profilit zyrtar Facebook, Qendra e Studentëve-Prishtinë.

“Qendra e Studentëve e Universitetit të Prishtinës si pasojë e zhvillimeve epidemiologjike me Covid-19 dhe në bazë të rekomandimeve nga IKSHPK-ja këtë vit do të pranojë rreth 1600 studentë, pra një student në një dhomë. Edhe në këto rrethana QS ofron strehim, ushqim si dhe hapësirat për studim”, thuhet në njoftim.

Mënyra e përzgjedhjes së kandidatëve të cilët do të fitojnë të drejtën për strehim dhe ushqim do të bëhet në bazë të kritereve të përcaktuara me konkurs.

Këtë vit ndarja e vendeve për strehim në konviktet e Qendrës se Studentëve, do të bëhet në bazë të kërkesës së Rektoratit të Universitetit të Prishtinës dhe atë 70% e këtyre vendeve do të ndahen për fakultetet, programet e studimit të të cilave përmbajnë lëndë praktike dhe labaratorike si dhe 30% për fakultetet, programet e të cilave përmbajnë komponentët teorike.

“Çmimi do të jetë 35 euro për muaj (20 euro banimi, 15 euro ushqimi)”, thuhet në njoftim.