Pozicioni i Serbisë në çështjen e Kosovës, nuk ka ndryshuar as edhe nga nënshkrimi i marrëveshjes për normalizim të marrëdhënieve ekonomike në Washington.

Kështu ka deklaruar së fundi, Presidenti serb Aleksandar Vuçiq.

“Sa i përket pozicionit të Serbisë, ai ka mbetur i pandryshuar”, iu përgjigj Vuçiq pyetjes së një gazetari të mediave ruse.

Vuçiq theksoi se marrëveshja e 4 shtatorit ka të bëjë vetëm me normalizimin ekonomik.

“Nuk ka asnjë moment politik atje”, ka shtuar ai.

Më tej ai ka theksuar se nuk ishte veçanërisht optimist për sa i përket zgjidhjes së çështjeve politike.

”Është e qartë se po përballemi me një kërkim shumë të gjatë, të vështirë, unë do të thoja, edhe të dhimbshëm për një kompromis, nëse kjo është e mundur fare”, thotë ai.

Vuçiq gjithashtu tha se Serbia nuk e nënshkroi dokumentin në të cilin përmendet njohja e Kosovës nga Izraeli.

“Ky është ndryshimi midis verzioneve serbe dhe shqipe të dokumenteve që u nënshkruan. Ne nuk e nënshkruam dokumentin trepalësh”, tha ai.