Dy laboratorë të pavarur kanë konfirmuar gjetjet e autoriteteve gjermane se Alexei Navalny, kritiku i presidentit rus, Vladimir Putin, është helmuar me Noviçok, helm ky që e posedojnë vetëm autoritetet ruse, raporton Sky News, transmeton portali “Front Online”.

Laboratorët special në Suedi dhe Francë kanë zbuluar se lideri rus i opozitës, Alexei Navalny, është helmuar me Noviçok, ka deklaruar një zëdhënës për Qeverinë gjermane.

Navalny, një kritik i hapur i Vladimir Putin, është duke u trajtuar në një spital të Berlinit, pasi u sëmur muajin e kaluar gjatë një fluturimi brenda territorit të Rusisë.

Mostrat e marra prej tij janë dërguar gjithashtu për analiza në Organizatën për Parandalimin e Armëve Kimike (OPCË) në Hagë.

Mjekët gjermanë kanë thënë se ai i është ekspozuar agjentit nervor të kategorisë ushtarake, Noviçok.
Më herët sekretari amerikan i Shtetit, Mike Pompeo, tha se ka shumë mundësi që helmimi i udhëheqësit rus të opozitës, Aleksei Navalny, të jetë urdhëruar nga zyrtarë të lartë në Moskë.

Pompeo, duke folur në një intervistë më 9 shtator, tha se njerëzit në të gjithë botën “e shohin këtë lloj aktiviteti për atë që është”.

Përndryshe, Navalny ka udhëhequr protestat mbarëkombëtare kundër presidentit rus, Vladimir Putin, dhe në të kaluarën është sulmuar me një kimikat të rrezikshëm në një qendër paraburgimi rus.

Kundërshtarë të tjerë të Kremlinit janë vrarë ose shënjestruar në vitet e fundit, duke përfshirë gazetaren hulumtuese, Anna Politkovskaya, ish-oficerin rus të sigurisë Aleksandr Litvinenko, ish -zëvendëskryeministrin rus dhe udhëheqësin e opozitës Boris Nemtsov dhe ish-agjentin e dyfishtë rus, Sergei Skripal.

Skripal dhe vajza e tij, Julia, u helmuan me Noviçok në qytetin britanik të Salisbury në 2018, dhe hetuesit britanikë, për këtë rast, kanë implikuar agjencitë ruse të sigurisë.

/Front Online/